Eguerdiko suziriarekin, bost eguneko festei hasiera emango zaie gaur

Goizeko 11:30ean, Azkoitiko Musika Bandari omenaldia egingo zaio Udal Areto Nagusian ekitaldi irekian

JOAQUIN SUDUPEAZKOITIA.

Gaur eguerdian suziriarekin batera hasiko dira Andramaixek. Udarako festa handiaren bezpera da eta bost egunetan izango dugu hainbat eginkizun herrian. Txupinazoa jaurti baino lehen, 11:30ean, Musika Bandari omenaldia egingo zaio, bere 150 urteko ibilbidean herritik eta herriarentzat musika egin duelako. Udal Areto Nagusian. Ekitaldi irekia izango da.

Eguerdiko 12:00etan, 2019ko Andramaixei hasiera emango dien txupinazoa botako du Musika Bandak. Ondoren, Bandaren, Parrokiako abesbatzaren eta Iraurgi abesbatzaren laguntzaz, herritar guztiok 'Azkoitia' abestuko dute eta Eltziegoko Dultzaineroek “Kandido” obra eskainiko dute eta Azkoitiko, Txantreako eta Buztintxuriko erraldoi eta buruhandien kalejira abiatuko da.

Arratsaldeko 17:00etan, enparantzan haur parkea ipiniko da eta 19:30ean 'Rockalean' musika kale ikuskizuna.

19:50ean, Udalbatzari eliza nagusira lagunduz, Txalkor Txistulari taldeak 'Alkate soinua' joko du eta 20:00etan, parrokian, Ignacio Busca Sagastizabalen 'Salbea' zazpi ahotsetara eta Aita Nemesio Otañoren 'Ave María' bost ahotsetara abestuko da. Amaitzeko, Mariano Garcíaren 'Ama Birjinaren edertasuna'. Bakarlariak, Felix Uranga baritonoa eta Iñaki Goenaga tenorea izango dira; organoan, Jose Luis Francesena eta zuzendaria Inazio Alberdi.

Egunari bukaera emateko, 23:00etan “Gozategi” taldearekin dantzaldia plazan.

23:00etan, eliza atarian, Eusko Jaurlaritzak babestuta, gune bat jarriko da alkoholemia froga prebentiboa egiteko eta honen inguruan informazioa zabaltzeko.

Biharko egitaraua

09:30ean hasita, Eltziegoko Dultzaineroen kalejira eta, 10:00etan Banda eta Txalkor txistulari taldearen kalejirak. 10:50ean, Udalbatzari parrokiara lagunduz, Banda eta Txalkor txistulari taldea eta 11:00etan, meza nagusian, herritarrek Miguel Mª Azpiazuren 'Pakea Lurrean' meza abestuko dute bost ahotsetara, Jaunartzean Aita Nemesio Otañoren 'O Sacrum convivium' eta bukaeran, F.Gorritiren 'Agur Jesusen Ama'.

12:00etan, Eltziegoko Dultzaineroek lagunduta, erraldoi eta buruhandien kalejira eta ondoren, 13:00etan, Herriko Musika Bandak eta Txalkor txistulari taldeak kontzertua Kontzejupean.

Arratsaldeko 17:00etan, Gurea pilotalekuan. Zarauzko pilota torneoko final aurrekoak, Irribarria-Rezusta eta Olaizola II-Albisu.

17:30ean, zezen txikiak eta poniak egongo dira Trenbidearen Zumardian eta, 18:30ean 'Freestyle bike show' ikuskizuna Balda plazan.

20:00etan, Azkoitiko gimnastika erritmikoko taldearen erakustaldia, Eliz atarian. Ordu berean, Eltziegoko dultzaineroen kalejira eta gaueko 22:00etan IX. Film Laburren Lehiaketa 'Beldurra' gaiarekin Herriko plazan izango da. 23:45ean, DEUS EZ taldearen kontzertua, Herriko plazan izango da egunari agur esateko asmoz.

Más