Azkoitia

Bollo-trans bertso-saio ibiltaria, Sexu Askapenaren eta Harrotasunaren eguna ospatzeko

Larunbat honetan, ekainaren 28an, Sexu Askapenaren eta Harrotasunaren Nazioarteko Eguna da, eta Udalak LGTBI+ kolektiboen eskubideak aldarrikatzen jarraitzeko asmoz, herritarrak gonbidatu nahi ditu Bollo-trans bertso saio ibiltariarekin bat egitera. Saioa bihar, ostiralean, egingo da, 19:30etik aurrera.

Miren Artetxe, Eli Pagola eta Saioa Alkaiza bertsolariak ibiliko dira kantuan, Xabier Etxaniz trikitilariak eta Uxue Kerejeta pandero-joleak lagunduta.

Bertsolariek Aita Madinabeitia plazan jarri dute topagunea, eta handik Plazaberrira joango dira lehenengo, eta Herriko plazara gero. Eguraldi txarra egingo balu, ibilbidea ondorengoa izango da: Elkarguneko tuneletik Azoka plazara, eta handik, Kontzejupera.

Gai-jartzaile batek lagunduta, LGTBI+ ikuspegia oinarri eta feminismoa iparrorratz, inprobisatu, sortu, jolastu eta askotariko gaiak aldarrikatuko dituzte. «Bertso-saio honek gogoeta sorrarazi nahi du, estereotipoak eta aurreiritziak umorez hautsi, oraingo diskurtsoak zalantzan jarri eta, bereziki, primeran pasarazi, giro atsegin eta dibertigarrian», aurreratu dute.

Udalak, Berdintasun arloaren eskutik, LGTBI+ pertsonen errealitateari buruzko diagnostikoa egingo du, irailean hasita. «Helburua da diagnostikoa egin ondoren ekintza-plana lantzea, inork jasan ez dezan bere sexu-orientazioagatik edo genero identitatearengatik, ikusezintasunik, diskriminaziorik edo indarkeriarik», azaldu dute.