«Azkoitia herriari izena eta izana eman dion kirolaria»

Udaletxean eginiko liburu aurkezpenean, Goenatxo eta bere senideak alkatearekin. /  SUDUPE
Udaletxean eginiko liburu aurkezpenean, Goenatxo eta bere senideak alkatearekin. / SUDUPE

Goenatxo II.aren biografia aurkeztu zen atzo udaletxean, gainezka zegoen udal aretoan

JOAQUIN SUDUPE AZKOITIA.

«Ohitura zaharrak eta herri kirola erakutsi eta jarraipena eman dion gizonari, bizkar gainean harri handiaren baino handiago duen bihotzeko gizonari, alai, eskuzabal eta dena emateko prest dagoen gizonari, Azkoitia herriari izena eta izana eman dion kirolariari» gorazarre egin zitzaion atzo goizean udaletxean. Azkoitiko alkateak erabili zituen hitz hauek Goenatxo II. harri-jasotzaile azkoitiarrari eginiko ekitaldian, bere lan handia aitortzeko. Bete-beteriko udal aretoan jaso zuen Juan Jose Unanuek omenaldia. Alvaro Bermejok idatzitako 'Goenatxo II. Gehiena eta Gorena' izenburua duen biografia liburua aurkeztu zen bertan.

Bermejok liburuaren idazketa egin zuen eta Joxemi Saizarrek, berriz, itzulpena. Argazkiez eta diseinuaz, berriz, Joseba Urretabizkaia arduratu da. Xibarit argitaletxeak Jentilak bildumaren baitan argitaratzen duen seigarren liburua da Goenatxorena. Herriko liburu-dendetan eskuratu ahal izango da liburu biografikoa.

Arratsaldean, Gurea Frontoian omenaldia egin zioten eta bertan aizkolariak eta harri-jasotzaileak aritu ziren norgehiagoka.