Artea eta nortasuna ezagutzeko ibilbide gidatua antolatu du Musika Hamabostaldiak bihar

Christoph Kuhlmannek organo kontzertua eskainiko du bihar San Salbatore elizan. /  MIKEL FRAILE
Christoph Kuhlmannek organo kontzertua eskainiko du bihar San Salbatore elizan. / MIKEL FRAILE

Organo kontzertuarekin batera, herrian San Salbatore eliza ardatz izango duen bisita egingo da

El Diario Vasco
EL DIARIO VASCOUSURBIL.

Urkoren abestiak dioen bezala, Usurbilgo elizaren hormak sendoak dira. Eta horma sendo horiek herriko historiaren hainbat pasarteren lekuko izan dira. Mendeak igaro ahala, gizartea eraldatzen joan da, eta honekin batera, herriko ardatza izan den eraikin honen arkitektura eta erabilpenak. Musika Hamabostaldiaren baitan, ibilbide gidatua antolatu da bihar arratsaldean, herriaren istorian garrantzia izan duten hainbat pasarte gogoratzeko:

hiribilduaren fundazioa, Erdi Aroko erlijio-ordenak, erretoreen eta herritarren arteko liskarrak, Ameriketan pilatutako ondasunei esker sortutako arte-lanak, edota Usurbilen organo eta organisten garrantzia.

Bisita gidatua 17.30ean hasiko da, frontoian, eta jarraian San Salbatore elizara bisita berezia egingo da. 19.00etan Aritzabal jatetxean mokadutxoa eskainiko zaie parte hartzaileei eta 20.00etan Cristoph Kuhlmannen organo kontzertua entzutera bueltatuko dira San Salbatore elizara.

Bisitan parte hartzeko beharrezkoa da izen ematea 688 818 017 telefonora deituz edo info@kultour.pro korreora idatziz. Ekimenak 6 euroko prezioa du eta azalpenak euskaraz emango dira

Organo kontzertua

Cristoph Kuhlmann alemaniarrak Wagner, Liszt, Schumann eta beste konpositore erromantiko batzuen obrekin gozatzeko aukera emango du bihar Usurbilgo organoan. Hain zuzen, bereziki ongi ezagutzen du Usurbilgo instrumentu aparta, disko konpaktu bat grabatu baitzuen harekin. Kontzertua 20.00etan hasiko eta sarrera doan izango da bertara hurbiltzen direnentzat.