Aginagako San Praixku jaien azken bi egunetarako dena prest

Txan Magoak emanaldia eskainiko du bihar arratsaldaean. /  J.A.
Txan Magoak emanaldia eskainiko du bihar arratsaldaean. / J.A.

Oilasko bila aterako dira goizean eta arratsaldean Txan magoak ikuskizuna eskainiko du

JOSU ARANBERRI USURBIL.

Aginagako San Praixku jaiek jarraipena izango dute bihar eta etzi. Pasa den ostegunean, San Praixku egunez, hasi ziren bertako jaiak eta asteburuan ekimen ugari izan ostean, ostiralez eta larunbatez ere zer egin eta zertaz gozaturik ez da faltako.

Bihar goizeko 6.00etan oilaskobiltzaileak irtengo dira oilasko biltzera. 12.00etan Aginagako haurrak eta animatzen direnak oilasko biltzaileekin batuko dira Mapilen eta 15.00etan oilasko biltzaileen bazkaria izango da frontoiko karpan.

Arratsalderako ere ekintza ugari iragarrita daude. 17.30etan Txan magoaren emanaldia izango da eta ondoren, 18.30etan, perkusio tailerra. 20.00etan, berriz, patata tortila lehiaketa egingo dute, 21.00etan izango den gazte afariaren aurretik. Gauean, 22.00etan, Andoni Ollokiegi bakarlariaren emanaldia iragarrita dago eta 23.30etan Oharkabe erromeria eliza zaharrean. festarekin jarraitu nahi duenarentzat DJ Seumar izango da eta ondoren karaoke baldarra.

Larunbata, aurtengo San Praixku jaietako azken eguna, Gaupasa eguna modura izendatuta dute. 12.00etan Molto-moto lasterketa izango da eta 13.00etan tira txinas jaurtiketa.

Arratsaldean, XXXVII. mus txapelketa herrikoia egingo dute 16:00etan, izen ematea 15:30etatik 16:00etara egiteko aukera izango delarik. Ordu berean haurrek ere festetan murgiltzeko aukera izango dute, Partxis lehiaketa izango baita ludotekan. 17.00etan Larrian Gozo taldea entzun ahal izango da eliza zaharrean eta 19.00etatik aurrera Elektrotxufla elektrotxaranga ibiliko da Aginaga aldean.

Gauean ere ez da zuzeneko emanaldirik faltako. Los Zopilotes Txirriaos eta Laiotz taldeak izango dira Aginagako pilotalekuan eta 4.00etan hasita Dj Txankleta eta Dj JoTaTxo. Jaiei amaiera emateko Elektropapo elektrotxarangaren laguntzarekin errefus-bilketa egingo dute.

 

Fotos

Vídeos