AECC Gipuzkoak Getariara hurbilduko du astelehen honetan azaleko minbiziaren kanpaina

Kanpaina. Astelehenean Getariara etorriko dira boluntarioak. /
Kanpaina. Astelehenean Getariara etorriko dira boluntarioak.

Nahi duenari azaleko melanina neurtuko zaio Malkorbe hondartzan

JUAN MARI ZUBIAURRE GETARIA.

Gipuzkoako Minbiziaren Aurkako Elkarteak Getariako Marlkobe hondartzara eramango du azaleko minbiziaren aurkako prebentzio kanpaina astelehen honetan. Boluntarioen laguntzarekin, langile kualifikatuak izango dituen unitate mugikor egokitu batek, Gipuzkoako hondartza guztiak eta kostaldekoak ez diren beste udalerri batzuk bisitatuko ditu, eguzki esposizioarekin lotutako arriskuei buruzko informazioa emateko.

Horretarako, nahi duten guztiei, beren azaleko melanina neurtuko zaie, eguzki izpiekiko gomendatutako esposizio denbora ezagutzeko. Era berean, eguzkia behar bezala hartzeko neurriak jasotzen dituzten azalpen-materialak eman eta azalaren automiaketa egiteko argibideak eskainiko dituzte. Eta, nola ez, bertaratutakoek egin ditzaketen zalantzak argitzeko balioko du ekimenak. Doakoa den jardunaldi honen ordutegia 10:00etatik 13:00etara bitartekoa izango da.

«Azaleko minbizia da mundu osoan ohikoena eta beste edozein tumore baino bizkorrago ari da ugaritzen. Hala ere, minbizia mota guztien artean, modu errazenean prebenitu daitekeena da», adierazi du Maider Sierrak, AECC Gipuzkoako prebentzio arloko arduradunak.

Aholkuen artean, babesa bi orduz behin edo bainua hartu ondoren berritzea, begiak babestea eguzkitako betaurrekoak edo kapelu hegalzabalak erabilita edota hidratatzea, haurrengan eta adinekoengan arreta berezia jarriz. Lainotuta dauden egunetan, eguzki-erradiazioa, beste egun batzuetakoa bezain handia denean, arriskuak bere horretan jarraitzen duela azpimarratuko du beste mezu batek. Hori dela eta, beharrezkoa da geure buruak berdin-berdin babestea, batez ere, erradiazio ultramorearen maila handieneko orduetan: eguerdiko 12:00ak eta arratsaldeko 16:00ak artean. Gomendagarria da azalaren azterketak egitea aldizka edo orban eta orinen kolorean, forman edo neurrian aldaketaren bat gertatzen denean .

Contenido Patrocinado

Fotos

Vídeos