Olentzero eta Mari Domingi gaur abiatuko dira Berrasoetako parketik

URNIETA.

Aurten ere Egape Dan-tza elkarteak sustatuta, Egape dan-tza taldeko helduen, Txanbolin txistulari banda eta Lourdes Iriondo musika eskolako trikitilari taldearekin batera, 60 lagun inguru, Olentzero eta Mari Domingiren bisita espero da herrian.

Zazpigarren urtea da Gabonetako pertsonaia xarmagarri hauen etorreraz gozatu eta hauei eskutitzak entregatzeko aukera izango dutela herriko haurrek, beraiekin une goxoak partekatu eta argazkiak ateratzeko. «Urteak aurrera egin ahala geroz eta jende gehiago hurbiltzen da gurera, Urnieta bertako eta inguruko herrietako haur eta guraso ugari gerturatzen baitira etorrera eta ilusioz betetako une liluragarri honetaz gozatzera», adierazi dute antolatzaileek.

Beraz, gaur arratsaldean, 17:30ean, abiatuko dira Mari Domingi eta Olentzero Berrasoetako parketik, trikitilari, txistulari eta dantzariekin batera. Zubitxo eta Zaldundegiko plazetan dantza taldearen saioak eta plaza-dantza herrikoiak partekatuko dira, eta txikiak, amonak, gazteak, izeba-osabak ,gurasoak, eta herritar orok festa giroaz gozatu ahal izango du.

Zazpirak aldera iritsiko dira San Joan plazara eta merezi duten harrera eskaini ondoren, Olentzerok eta Mari Domingik ongietorria emango diete etxeko txikienei.

Harrera egin ondoren, haur guztiek Olentzero eta Mari Domingirekin argazkia atera, eskutitza eman, eta gaztain eta madalena goxoak dastatuz, ilunabar magikoaz goza-tzeko aukera izango dute beste urte batez.