Lasarte-Oria

Hurbileko magiaz gozatzeko aukera, motorrak berotzen hasteko

María Cortés

Lasarte-Oria

Miércoles, 16 de abril 2025, 19:56 | Actualizado 20:29h.

Comenta

Furgoneta bat, karpa bat, saltzeko materiala, musika eta giro bikaina. Euskaraldiaren Gune Ibiltaria Okendo plazan egin zuen bere geldialdia duela egun batzuk. Eguraldia euritsua eta goibela izan arren, lasarteoriatar mordoa hurbildu zen udaletxeko arkupeetara. Bertaratutakoek egitasmoaren inguruko nondik norakoak jaso ez ezik, magia ikuskizun bereziaz gozatzeko aukera izan zuten, hain zuzen, Asier Kidam magoaren ikuskizunaz gozatzeko tartea izan zuten. Gasteizko artistak gertuko magia egiten du, kartak eta txaponak bezalako elementuekin, eta ahozabalik utzi zituen Okendo plazara gerturatu zirenei. Tarte atsegin bat pasatu zuten helduek zein haurrek, magoaren trukoak ikusiz eta ikasiz.

Okendo plazan geldialdia egin zuen Gune Ibiltaria Euskal Herriko hainbat herritan barrena dabil aste hauetan, Euskaraldian izena emateko eta parte-hartze rolak ezagutzeko aukera emanez. 'Ahobizi' rola aukeratzen duten parte-hartzaileek ulertzen duten pertsona guztiekin euskaraz hitz egiteko konpromisoa hartzen dute, elkarrizketak euskaraz hasi eta ahal den guztietan euskaraz mantenduz. Bestalde, 'belarriprest' rola aukeratzen dutenek besteak euskaraz hitz egitera gonbidatzen dituzte, nahiz eta beraiek une bakoitzean erabaki zein hizkuntzatan erantzun. Okendon izen emateko aukera egon zen, baita zalantzak argitzeko eta bestelako informazioa jasotzeko. Euskaraldiaren inguruko materiala ere salgai egon zen. «Azken finean, herritarrak datorren hilean egingo den ariketa sozialari begira prestatzen joatea ere bazen Gune Ibiltariaren helburua», diote arduradunek.