Lasarte

Euskaraldiaren bideo laburren lehiaketan parte hartzeko azken egunak

Euskaraldiaren laugarren edizioa maiatzaren 15etik 25era egingo dute, eta euskara ulertzen dutenen hizkuntza-ohituretan aldaketak bultzatzea izango du helburu.

Aurtengo edizioak berrikuntza nabarmen bat dakar: bideo-lehiaketa, jendea parte hartzera animatzeko eta euskararen erabilera sormenez sustatzeko. «Parte-hartzaileek minutu bateko bideoak aurkeztu beharko dituzte, eta hiru kategoriatan parte hartu ahal izango dute: banaka/binaka, taldeka eta familian. Kategoria bakoitzean bi sari egongo dira: 500 euro publikoaren boto gehien jasotzen duen bideorako eta 1.000 euro epaimahaiaren aukeratutako bideorako», adierazi dute arduradunek.

Udalak eta Ttakun Elkarteak herritarrak Euskaraldian eta bideo laburren lehiaketan parte hartzera animatu dituzte. «Sakelako telefonoa hartu eta gehienez ere minutu bat iraungo duen ikus-entzunezko bat grabatu behar da eta bidali. 'Merezi du Euskaraldian parte hartzea!' izango da bideoetako mezu nagusia», azaldu dute.