'Latxe' haurrentzako aldizkaria kalean dago

El Diario Vasco
EL DIARIO VASCO HERNANI.

Urumeako Kronikak, haurrentzako aldizkariaren 0 alea argitaratu berri du: Latxe du izena, Urumea ibaiak bustitzen duen bailaretako baten izena, alegia.

Irakurtzeko euskarazko aldizkaria da Latxe, jolas, ekintza eta denbora pasa parte hartzaileekin uztartzen dena.

Urumea bailarako ondarea, ohiturak, ezaugarriak eta ahozkotasuna lantzen ditu bere orrialdeetan. Eta azkenik, aniztasun sozialean eta balioetan hezteko ezaugarriak ditu bere baitan. Horretarako, detaile txikietan oinarritu dira pertsonaiak garatzeko orduan. Protagonistak berak, Burruntzik, hegalak hautsita ditu eta oso erraz galtzen da. Bidean lagun asko egingo ditu eta asko ikasiko du beraiekin; esate baterako: Floridako dortokak jatorri eta bizitokiak erakutsiko dizkio; Kattagorriak, gorra izanik, zeinu hizkuntza nola erabili erakutsiko dio; baina bidean bestelako animaliaren batekin ere egingo du topo, Erbinudearekin hain zuzen, eta azkar ibili beharko du Burruntzik, erbinudeak oiloak hil eta arrautzik gabe geratu nahi ez badu.

Uztailean

Uztailean argitaratu da Latxeren 0 alea, eta Astigarraga, Hernani, Ereñotzu, Arano eta Goizuetako umeen artean zabaldu da. Guztira, 700 ale inguru banatu dira. Udaleku irekiak aukera bikaina izan dira ume guztiak bildu eta aleak banatzeko. Sorpresa txiki bat ere izan dute haur hauek. Izan ere, Latxeko protagonista bera, Burruntzi, joan zaie bisitan; eta aldizkariak ez ezik, makina bat muxu eta bosteko ere banatu ditu denen artean.

Hilabetero-hilabetero Burruntziren abenturak segi ahal izateko, Kronikalari txiki egin beharko dute irakurle txiki hauek, eta urtean 24 euroren truke, beraiek eskatutako Kronikako ohiko puntuan jaso ahal izango dute bere hilabetekaria. Horretarako, Hernaniko Larramendi kalea 11ko bulegotik pasa, 943 33 08 99ra deitu edo latxe@kronika.eus helbidera idaztea nahikoa izango da.

 

Fotos

Vídeos