Hernani

Egun handia ostiral honetan Ereñotzuko San Antonio jaietan, ekitaldi askorekin

Ereñotzu auzoan San Antonio jaiak ospatzen ari dira. Ostirala egun handia da eta jaien hasiera ofiziala biziko da. Horrela, Ttapa-Ttapako kideek jai hasierako suziria botako dute 12:00etan eta ondoren buruhandien txanda izango da auzoko kaleetan zehar korrika. Ereñotzuko plazan, halaber, herri kirolen saio bat egingo da: Igor Pikabea, Laiene Pikabea, Jokin Urretabizkaia eta Malen Barrenetxea aizkolarien partaidetzarekin. Harriarekin Mikel Lopetegi 'Urra' eta Maddi Gesala arituko dira lanean. Ekitaldian Agin Laburu eta Unai Agirre bertsolariek hartuko dute parte. Arratsaldean pilota partidak, frontoian afari herrikoia, Spize taldearen kontzertua gaueko hamabietan eta ondoren DZ dj-a. Larunbatean pilota partidekin hasiko da jardunaldia frontoian 11.00etan. Kirol eta aisia guneko obra dela eta, aparkalekurik ez dago eta autobusez gerturatzea eskatzen da.