Ariane Obineta, Larramendi Kultur Bazkunako lehendakari berria

Ariane Obineta Gorostidi Bazkunako lehendakari berria izango da. /
Ariane Obineta Gorostidi Bazkunako lehendakari berria izango da.

Elkarteak urteko biltzar nagusia egingo du gaur goizean Bastero Kulturgunean | Ia 27 urtez lehendakari izan den Jon Unanue Lopezen lekukoa hartuko du

El Diario Vasco
EL DIARIO VASCO ANDOAIN.

Urtero legez, gaur, Manuel Larramendi Kultur Bazkunak bere urteko Biltzar Nagusia egingo du Andoainen, Bastero Kulturguneko ekitaldi aretoan, goizeko hamar eta erdietan hasita, eta bertara deitu ditu bazkide guztiak.

Ohiko gaiak landuko dituzte Biltzar Nagusian: 2018ko jardunaren gaineko azterketa egin eta dirukontuak aztertuko dituzte, bazkideen gora-beherak, baina bereziki etorkizunari begira egingo den biltzarra da, Kultur Bazkunak lehendakari berria hautatuko baitu. Izan ere, 2018. urteari dagozkion kontuak itxita, aztergaia, zuzendaritza berria hautatzea izango da, gutxienez datozen bi urtetako kontuez arduratuko dena. Eta hor gertatuko da aldaketa: ia 27 urtez lehendakari izan den Jon Unanue Lopezek lekukoa lehendakari berriari emango dio, bai behinik behin bazkideek onartzen badute.

Hautagaia Ariane Obineta Gorostidi da, 23 urteko andoaindar gaztea, Euskal Filologian graduatua, hurrengo urtetan Larramendi Bazkuna zuzentzeko ardura hartuko duena. Oso gazte helduko dio ardura horri Ariane Obinetak, baina ez da bakarrik izango. Orain arte lanean jardun duen Zuzendaritza Batzordea berarekin izango du eta, gainera, Jon Unanuek berak Kultur Bazkunean lanean jarraituko du, bolada batez, orain zuzendari gisa, lehendakari berriak egoera egonkortu, ildo estrategiko berriak finkatu eta Kultur Bazkunaren etorkizuna nondik etorriko den marrazten duten arte.

Bi erronka

Obinetak bi erronka nagusi izango ditu: batetik, Kultur Bazkuna 'gazteagotzeko' eta indartzeko erronka izango du, euskaltzale gazteak ekimenera hurbildu eta lan-jarduna biziberritu. Bigarren erronka gaur gaurkoz, bizirik dagoen lan-egitarauari, hots, ekintzei, eustea izango da, dirubide berriak lortzea eta, oso bereziki, orain Larramendi Bazkunak gogoan duen egitasmo nagusiarekin aurrera egitea: Garagorrienea egitasmoarekin, zeinaren bidez euskalgin-tzan, kulturgin-tzan eta herrigintzan Manuel Larramendik izan zuen eredugarritasun eta aitzindaritza aldarrikatu nahi baita, azken 300 urteetako euskalgintzaren kontakizuna egin eta, oso bereziki, bide eta leiho berriak zabaldu etorkizuneko belaunaldiek euskaraz hazi eta bizitzeko eredurik eta jarraibiderik izan dezaten, hots, euskaldun izateko hitzez eta ekintzez.