Andoain

Andoaingo I. Lanbide Heziketako Azoka martxoaren 29an egingo da

Ostiral honetan aurkeztu zen ofizialki martxoaren 29an, datorren larunbatean, egingo den Andoaingo I. Lanbide Heziketako Azoka. La Salle Berrozpe ikastetxeak, Leizaran Institutuak eta Zine eta Bideo Eskolak lehen aldiz antolatu dute Andoainen mota horretako ekimena. Hiru ikastetxeetako ordezkariak 10:00etatik 13:00etara bilduko dira Plaza Morean, eta bakoitzak bere eskolaren eta aurtengo heziketako zikloen eskaintza aurkeztuko du.

Interesa duen orok hurbiletik ezagutu ahal izango du egindako lana, eta 12:00etan, Andoaingo alkate Andoni Alvarezek eta ikastetxe bakoitzeko arduradunek hitzaldi txiki bat emango dute, «eskaintzen duten lanbide-heziketari eta lan-metodologiari buruzko informazio zehatzagoa emateko», adierazi zuten atzo.

Esan bezala, aukera zabala egongo da azokan. La Salle Berrozpe ikastetxeak hiru ardatz nagusitan oinarritzen du bere heziketa-eredua: kidetza, berrikuntza eta iraunkortasuna. Duen eskaintza akademiko zabalaren barruan, lanbide-heziketako zikloak nabarmendu nahi dira azokan.

Leizaran Institutua, berriz, Andoaingo ikastetxe publikoa da, eta DBH, Batxilergoa eta Lanbide Heziketako zikloak eskaintzen dira. Azken honetan, bi ziklo nagusi eskaintzen dira: gizarteratzea (goi mailako zikloa) eta arreta (erdi mailako zikloa).

Azkenik, ESCIVI zinema eta bideo arloko Euskal Herriko eskola nagusia da. Bideo-eskolaren eskaintza akademikoak lanbide-heziketako programa sorta zabala biltzen du: irudiari eta soinuari buruzko goi-mailako eta erdi-mailako zikloetatik, ekoizpen zinematografiko eta ikus-entzunezko master eta ikastaroetara.