Irun

Ostomilak bere 'Baleazaleak' antzeztuko du Euskaraldiaren egitarauaren barne

Euskaraldiaren programak kultur aukera ugari ekarri ditu Irunera azken egunetan eta, igandean amaitu aurretik, bereziki etxeko txikiei zuzendutako hitzordu berri bat eskainiko du: 'Baleazaleak' emanaldia izango da ikusgai larunbatean, 17:30etatik aurrera Pio XII plazan Ostomila Txotxongilo Taldearen eskutik.

«Balea-abentura bat da, eta neskato baten istorioa», laburbiltzen du taldeko Tamara Cuéllarrek. Txotxongiloak eta zuzeneko musika uztartzen ditu Rubén Mejutorekin batera sortu duen ikuskizun honek. Emanaldietan, bi edo hiru abeslarik eta ukelele- edo gitarrajole batek parte hartzen dute. Euskal kulturak garrantzia du istorioan, baina baita mik ́maq tribuarena: 'Baleazaleak' ikerketa sakon baten ondorioa da, non bi kulturen arteko loturak aurkitu zituzten egileek. Emaitza, Elaiaren istorioa da, txotxongilo bidez irudikatua.

Elaia gaur egungo neska euskalduna da, «bertan jaio den hirugarren belaunaldia». Hala ere, oso presente ditu bere mik'maq sustraiak: «hango hizkuntza eta kultura ezagutzen ditu», baina bilaketan sakondu nahi du. Hori dela eta, Elaiak baleazaleen garaira bidaia hasiko du: leku ezkutuak eta mik'maq kulturako izaki mitologikoak ezagutuko ditu; haien artean, suge lumatua.

Rubén eta Tamarak gogorarazten dutenez, 'Baleazaleak' Irunen estreinatu zen 2023ko abuztuan. Ordutik, Galizia, Nikaragua, Costa Rica edo Kubaraino iritsi da Elaiaren historia. Bihar, etxean antzeztuko da berriz ere, ezagutzen ez duten familiei 'Baleazaleak' istorioan murgiltzeko aukera ezinhobea eskainiz.