Irun

Euskaraldiaren irekiera ekitaldia, bihar Zabaltza plazan

Hasiera ofiziala emango diote bihar, osteguna, Euskaraldiari. Irekiera ekitaldia Zabaltza plazan ospatuko dute 19:00etan. Hainbat jarduera egongo dira: Peñagarikano,Telleria eta Agirre bertsolariek parte hartuko dute, erromeria eskainiko du Auntxa Trikitixa Eskolak eta dantza ere izango da Pauso-K-ren eskutik. Honez gain, bihar, 18:00etan, Oinkada Muxiko Taldeak emanaldia eskainiko du Zentroko Auzo Elkartean.

Udalak eta hiriko hainbat eragileek osatutako programak aurrera egingo du larunbatean: globoflexia tailerra, aurpegi margotzea, ipuin kontalaria eta kalejira antolatu ditu Artia Auzo Elkarteak 11:00etatik aurrera. 17:00etan, Urdanibia plazan, Kidam magoak ikuskizuna eskainiko du, eta 19:00etan, leku berean, bingo saioa ospatuko da Yogurinaha Borova eta Aurori Badiolaren eskutik.

Igandean, mintzagosaria izango da 9:00etan Santiagoko El Bule eta Iñaki-Alaitsu tabernetan, eta 18:00etan 'Euskaldungak' antzerki saioa eskainiko dute Aroa Blancok eta Maite Lopezek Urdanibia plazan.