Irun

Euskaraldia aurrera doa egitarau zabalarekin

Irun ere murgilduta dago Euskaraldiaren giroan eta egitarau zabala gauzatuko da datozen egunetan. Gaur bertan, igandearekin, Aroa Blancok eta Maite Lopezek 'Euskaldungak' antzezlana eskainiko dute Urdanibia plazan, 18:00etatik aurrera.

Bihar, astelehena, CBA liburutegiaren txanda da: bertan 'Kutxidazu bidea, Ixabel' liburuaren irakurketa egingo da, 18:00etatik aurrera eta Alberdania argitaletxearen laguntzarekin. Joxean Sagastizabal liburuaren idazlea bertan izango da baita ere. Asteartean, Euskaraldia Amaia Kultur Zentrora mugituko da: 19:00etan, 'ZtandaP' bakarrizketa eskainiko dute Mirari Martiarenak eta Idoia Torregaraik.

Asteazkenean, Euskaraldiaren aldeko bazkaria antolatu dute Eguzkitza bigarren hezkuntzako eskolak, Eusliderrak eta AEK Euskaltegiak. 19:00etan, berriz, Hikodromoa topaketa egingo da EKT Elkartean. Ostegunean, 'Hatsaren poesia' liburua aurkeztuko da Zentroko Auzo Elkartean, 19:00etatik aurrera.