Irun

Abian da Euskaraldiaren atarikoa izango den Euskararen Hilabetea

Euskaren Hilabetea abian da atzotik «jardueraz gainezka», adierazi zuen Iosu Iguiñiz euskara ordezkariak. «Hizkuntza ohituretan eragitea ezinbestekoa da euskara sustatu nahi baldin badugu, eta lortzeko Euskararen Hilabetea bultzatu dugu. Gure hizkuntzaren erabilera handitzeko lanean jarraitzen dugu, eta. horretarako. gazteei zuzendutako jarduerak antolatu ditugu ikastetxeetan, lagunen artean, kirolean, gurasoekin eta aisialdian euskararen erabilera bultzatzeko».

Aurten, Euskaraldia maiatzaren 15etik 25era antolatu dute. Asteartean «izan genuen antolakuntzarako bigarren bilera. Euskararen erabileran kontzientzia pizten lagun izango dugu Euskaraldia», azpimarratu zuen euskara ordezkariak. Haren atarikoa izango da Euskaren hilabetea, kasu honetan, batez ere gazteengan arreta jarrita, eta protagonistak izango dira Udaleko euskara arlotik bultzatu diren egitasmoetan. Hiru multzotan banatu zituen Iguiñizek: «Amaia Kultur Zentroan egingo diren euskarazko antzezlanak, Iruneroren bi zenbaki berezi eta Mintzodromo gaztea».

Antzerki saioak Haur Hezkuntzako (3, 4 eta 5 mailak), Lehen Hezkuntzako (3 eta 4 mailak) eta Derrigorrezko Bigarren Hezkuntzako (1, 2, 3 eta 4 mailak) ikasleei zuzenduko dira.

Mintzodromo gaztea Palmera Monteron eta Mondragon Unibertsitateko tokiko ikasleen ardurapean egingo dute, DBH-ko 4. mailakoei zuzenduko da. Era berean, zinegotziak aurreratu zuenez, «gazteek hainbat gairen inguruan, euskaraz egiteko aukera izango dute beste institutuetako ikasleekin».

Irunerori dagokionez, ikasleen ekarpenekin bi zenbaki berezi egingo dira. Bat Haur Hezkuntza eta Lehen Hezkuntzako 4. maila bitarteko ikasleen lanekin eta bestea Lehen Hezkuntzako 5. mailatik DBH-rako ikasleen lanekin. Euskara Arloaren programa borobiltzeko, Laburbirak proiekzioa eskainiko da aretoko hitzaldi aretoan apirilaren 9an.