Hondarribia

'Txoria hodei artean' liburuaren aurkezpena Kultur Etxean

'Txoria hodei artean. ETB lehen eta gero' izenburuko liburua aurkeztuko du gaur Urtzi Urkizuk Kultur Etxean, 19:00etatik aurrera. Euskaraldiaren barruan dagoen saioa da Blagan Euskara Elkarteak antolatuta. Aurkezpena eta elkarrizketa Ainara Zuazabeitiak egingo ditu.

Liburu honetan, ETBren lau hamarkadako ibilbidearen ikuspegi zabala eskaintzen du Urtzi Urkizu kazetariak. Telebista ezerrezetik sortu zen 'garai heroikoetatik' gaur egungo erronketara, adimen artifiziala kasu. Ikuspegi zabal horrek dokumentaziolan sendoa du oinarri, baina batez ere egileak hainbat aritu eta adituri egin dien elkarrizketa sorta oparoa. Hitzaurrea Itziar Ituñok egin du.

Kirol kaian, Jaizubian eta Mendelun izan ondoren, Euskaraldiaren mahai ibiltaria Kasino Zaharrean izango da larunbat honetan eta Amuten apirilaren 12an, bietan ere izena emateko aukerarekin eta haur eta helduentzako aktibitateekin, 11:00etatik 14:00etara.