Hondarribia

Taberna Ibiltaria eta Euskaraldiko lehen txapak

Sekulako giroa jarri zuen berriz ere Taberna Ibiltariak San Pedro kalean, eguerdian zein arratsean ere. Hondarribira lehenengoz 2018an etorri zen talde bizkaitarra, eta seigarrenez aritu zen euskal kantuak abesten, Alaiki Elkartearen eskutik. Gainera, Euskaraldiarekin bat egin zuen. Izan ere, 'ahobizi' eta 'belarripresten' txapak jasotzeko lehen aukera izan zen, baita izena emateko ere. Euskaraldiaren baitan, ostegunean 19:00etan 'Euskararen erabilera Hondarribian: argiak eta itzalak' mahai-ingurua eskainiko dute Kultur Etxean, Jaime Altunak gidatuta, Olatz Altuna, Saioa Zabala eta Mikeldi Zeberiorekin.