Hondarribia

Musika bideoak grabatzeko eta editatzeko gazteentzako bigarren tailerra egingo dute

Azaroan Hondarribian egingo den Amua musika film laburren jaialdiaren bosgarren edizioaren aurrerapen gisa, uztailean 16 eta 18 urte bitarteko gazteei zuzendutako musika bideoak grabatu eta editatzeko tailer bat antolatu du Hondarribia Kulturak, Amua Elkartearen laguntzarekin.

90 minutuko hiru klasetan banatutako formakuntza izango da, euskara hutsean burutuko dena uztailaren 15, 22 eta 29an 10:00etatik 11:30era, kultur etxean.

Tailerrak bederatzi lagunentzako tokia izango du, eta izena emateko epea zabalik dago uztailaren 3ra arte. Izena emateko, mezu elektroniko bat bidali beharko da mcarton@hondarribia. eus helbidera, izenburuan 'Bideosormen tailerra' adierazita.

Mezuan parte hartu nahi duen pertsonaren izena eta NANa adierazi behar dira eta adina egiaztatu. Izena ematen duten lehenengo bederatzi pertsonak tailerrean onartutakoak izango dira, eta gainerako hautagaiak itxarote-zerrenda batean sartuko dira.

Anuska Ariztimuño ikus-entzunezko errealizadore ezagunak eskainiko du tailerra. Audi, Movistar edo BMW bezalako marka ospetsuentzako pieza komertzialak zuzentzeagatik da ezaguna, baita egungo musika eszenako taldeentzako hainbat bideoklip egiteagatik ere.

Tailerrak izaera praktikoa izango du, eta mugikorraren erabilera izango du ardatz. Parte-hartzaileek mugikorren ikusizko aukerei etekina ateratzen eta horiek musika piezak grabatzeko erabiltzen ikasiko dute. Gainera, hirugarren klase praktikoan bideoak grabatu eta editatzeko aholkuak jasoko dituzte. Tailerrean egingo diren grabazioen emaitza Amua Jaialdian ikusi ahal izango da azaroaren 15ean.