'Hondarribian lan eta bizi' da EH Bilduren ardatza

EH Bilduk maiatzaren 26rako prestatu duen zerrendako partaideak, Bidasoa ibilbidean.
/
EH Bilduk maiatzaren 26rako prestatu duen zerrendako partaideak, Bidasoa ibilbidean.

Gaur egun udaletxean bi zinegotzi dituen alderdiaren zerrenda burua Xabier Isasi da

I.A. HONDARRIBIA.

Maiatzaren 26an egingo diren udal hauteskundeetarako EH Bildu taldeak osatu duen programaren ardatza 'Hondarribian lan ete bizi' izango da.

Gaur egun zinegotzi diren Carlos Gebara eta Mikel Garmendiak beste kide batzuei lekua utzi diete, nahiz eta lehena bosgarren lekuan agertu. Zerrendaburua Xabier Isasi da, 62 urtetako unibertsitateko irakaslea, Psikologia fakultatean. Deuston jaioa baina aspalditik Hondarribian bizi da eta 2012-2016 epean Eusko Legebiltzarrean parte hartu zuen.

EH Bildu
Xabier Isasi Balanzategi, Xabier Bengoetxea Erriondo, Oihana Etxebarrieta Legrand, Ziortza Ameztoi García, Carlos Gebara Urkiola, Uxue Criado Nieto, Garikoitz Arroyo Vega, Kotte Susperregi Aizpurua, Iban Clemente Martín, Ainhoa Olaizola Aginaga, Lur Irulegi González, Amets Mariskal Susperregi, Eneko Arzuaga Iridoi, Enar Agirre Oregi, Iosu Miren Goñi, Miren Legorburu Galayeta, Josu Barandiaran Bengoetxea, Kontxi Erro Jauregi, Paz Zendoia Sainz eta Karlos Santiago Etxeberria.

Taldeak bere burua definitzen du «feminista, euskaldun eta euskaltzalea, Euskal Herria eta askatasunaren aldeko borroka gogoan duguna, presoak aske nahi eta oroimena lantzen eta geroratze lanean dihardugunak; edonor eskuzabalik artatzeko eta harrera egiteko prest dagoena, natura eta kultura zaindu, biziberritu eta transmititzearen alde lan egingo duena».

EH Bilduk Hondarribian nahi duena «tokian tokiko merkataritza eta lan-jarduera duindu eta sustatzea da». Era berean, hurrengo legealdian «udalean eraginkortasuna eta enplegu publiko eta egonkorra bultzatuko duen» alderdi bezela agertzen da. Hots, «zubi lana eginaz herritarrekin, hauen parte hartzea bideratuaz eta gardentasuna azpimarratuaz; herriko elkarte eta erakundeekin elkarlanean jardunaz».

2011ko hauteskundetan bost zinegotzi lortu zituen EH Bilduk eta 2015 aldiz, bi.