'Eta...zer gehiago?' ikuskizuna datorren larunbatean Itsas Etxean

Ormazabal, Sagarzazu eta Egaña Itsas Etxea auditorioan atzoko prentsaurrekoan./
Ormazabal, Sagarzazu eta Egaña Itsas Etxea auditorioan atzoko prentsaurrekoan.

Bizitzak jartzen dizkigun bidegurutzeei buruzko emanaldia da | Xabier Lizaso eta German Ormazabal pianojoleak eta Andoni Egaña, narratzaile eta bertsolaria, dira protagonista antzezlanean

E.P. HONDARRIBIA.

Bizitzak bidegurutze asko jartzen dizkio edonorri. Horietako bat izango da hizpide larunbatean Itsas Etxean German Ormazabal, Xabier Lizaso eta Andoni Egaña protagonista direla. Ordu eta hogei minutuko emanaldia 20:00etan hasiko da eta sarrerak sei eurotan (hiru 18 urtetik beherakoen-tzat) Kutxabank Tickets web orrialdean eta Arma Plazako turismo bulegoan daude salgai eta larunbatean auditorioan bertan.

Ikuskizunaren aurkezpenean, Txomin Sagarzazu alkateak Itsas Etxearen eginkizunetariko bati erreferentzia egin zion. «Auditorioa, besteak beste, kultur adierazpenak eta sorkuntza lantzeko sortuta dago. Datorren larunbatekoa programa nagusi horren barruan sartzen da, baina bereziki euskal kultura zabaltzeko zentzuarekin. Horrelako gaitasuna eta ibilbide luzeko artistekin egiten bada, poza handiagoa da».

Andoni Egañak emanaldiaren jatorria azaldu zuen Itsas Etxean burututako prentsaurrekoan. Germanek eta Xabierrek aspaldi aipatu zioten bertsolariari bi pianoko emanaldi bat egiteko nahia. Baina, zer kontatu? «Nik egia kontatu behar genuela erantzun nien». Eta zer da egia? «Bizitzak bidegurutzeak jartzen dituela aurrean eta lehenengoetariko bat, seguraski injustuenetarikoa, selektibitatea iristear dagoela gertazen da. Tutoreak gazteari deitu eta galdera egiten dionean. Zer ikasteko asmoa duzu?»

German Ormazabal eta Xabier Lizasori bere garaian galdera hori egin ziotenean, biek gauza bera erantzun zuten: pianoa. Eta biek erantzun berdina jaso zuten. Eta... zer gehiago?

Antzezpenak bakoitzak zein bide ezberdin hartu zuen kontatzen du. Lizasok pianoa bakarrik ikasi zuen, Sevillan, Londresen eta Varsovian, eta Germanek etxean guraso on askok esan izan digutena entzun zuen: 'Hik ikusiko dek'. «Esaldi hori mehatxu bat baino okerragoa da. Germanek azkenean karrera unibertsitario bat egin zuen eta bakoitzak bere ibilbidea jarraitu zuen. Hori da kontatzen duguna nagusiki. Baita bizitzan hartzen ditugun bidegurutzeak batzutan ez direla betirako izaten», aipatu zuen Egañak.

Kontzertuaren helburua

German Ormazabalek kontzertuaren xede nagusia zein den gehitu nahi izan zuen. «Gure helburua etortzen den edozein bere burua gure hausnarketa eta galderetan isladatua ikustea da. Azken finean bakoitzak bere esparruan, bizitzan, bere profesioan, erabakiak hartu behar izaten ditu. Musika zoragarria entzungo da, ez ohizkoa den formatu batean, baina garrantsitsuena kontakizuna da».

Hirukotearen kontakizuna programa musikal indartsu batekin dator. Bertan Rachmaninov, Ravel, Chopin edota 'Cinena Paradiso' eta 'La Lista de Schindler' filmen soinu-bandak nahasten dira. Ikuskizunaren bukaeran «bost eskutara» joko dute. Andonik ere pianoa joko du baina esku bakarrarekin, «biekin oraindik ez naizelako moldatzen», aitortu zuen bertsolariak.