Jokin Etchart Fabaren errege berria koroatu dute Urdazubin

Jokin Etchart Fabaren errege berria koroatu dute Urdazubin

Nafarroako antzinako erresuman Erdi Aroan zegoen ohitura errepikatu dute

A.D.C.

Denboran atzera egin dute larunbat honetan Urdazubin, Fabaren erregea koroatzeko errituaren bidez. Izan ere, Nafarroako antzinako erresuman Erdi Aroan zegoen ohitura zaharra errepikatu dute beste behin Muthiko Alaiak elkarteak antolaturiko ekitaldian. Ekitaldi horretan ausaz aukeratutako haur behartsu bat errege izendatzen zuten egun batez. Nor izanen zen hautatzeko, erroska batean baba bat sartzen zuten. Hala, aurtengoan Urdazubiko Jokin Etchart 12 urteko gaztetxoak izan du ohore hori, herriko San Salbadorreko monastegian egin den ekitaldian. Pasa den abenduan egin zen aukeraketa herriko elkartean. Hamar neska-mutikok parte hartu zuten hautaketa prozesuan. Mahai bueltan elkartuta, errege-opil edo erroska zatiak dastatzen hasi ziren, Jokinek berearen barruan baba topatu zuen arte.

Fabaren erregea koroatzeko erritua pasa den mendeko 20ko hamarkadan berreskuratu zuen Ignacio Baleztena leitzarrak, eta 60ko hamarkadatik aurrera Muthiko Alaiak elkarteak Nafarroan herriz herri antolatzeko erabakia hartu zuen. Aurten Urdazubiren txanda izan da eta egun osoan izan da bertan, besteak beste, karriketan barna egin den desfile koloretsuarekin. Artisautza azoka, falkoneria erakusketak, zaldunen arteko lehiak eta musika ere izan dira.

Contenido Patrocinado

Fotos

Vídeos