'Artea familian', sormena eta euskara bultzatzeko egitasmoa

A. Z. ELGOIBAR.

Elgoibarko Izarraren Kiribilduz egitasmoak eta Egur Arte Tailerrak antolatu dute elkarlanean 'Artea familian' izeneko tailerra, Udalarekin lankidetzan. Egitasmo honek helburu bikoitza du: alde batetik, guraso eta seme-alaben artean eta familia ezberdinen artean euskararen erabilera sustatzea, eta bestetik, sormena lantzea.

Antolatzaileek adierazi dutenez, maiatzaren 5ean eta 12an emango dute tailerra Egur Arte Tailerrean (Merkatu plazako lehen solairuan). Saioak goizeko 10:00etan hasiko dira eta 13:00ak arte luzatuko dira. Haur Hezkun-tzako bosgarren mailatik Lehen Hezkuntzako bigarren mailara bitartean ikasten diharduten umeek, eta horien gurasoek, parte har dezakete.

Elgoibarko Izarra Euskaltzaleon Topagunearen bulegoan (Ubitarte 4, behea) zein Egur Arte Tailerrean eman daiteke izena, eta baita ere www.elgoibarkoizarra.eus web-orrian jarri duten formularioa betetzen. Zortzi euro ordaindu behar dira ikastaroan parte hartzeko(sei euro Elgoibarko Izarrako bazkideek eta Egur Arte Tailerreko ikasleek).