Markeskua jauregiak ikastaro berriak jasoko ditu ostegunetik aurrera

F. M. EIBAR.

Udako Euskal Unibertsitateak 46. urtez udako ikastaroak antolatu ditu eta aurtengo programako 15 Eibarren burutzen dira. Joan den ostegun eta ostiralean lehenak jorratu ziren eta datorren astearen hasieran ekitaldiak Baionara joango dira. Baina astea bukatu baino lehen, UEUko klaseak Markeskua jauregira bueltatuko dira. Uztailaren 5 eta 6ren artean 'Kataluniako Errepublika, zergatik eta zertarako', 'Blockchain: kriptotxanponez haratago, teknologia ezagutu eta trebatzeko tailerra', 'Grasshopper 3D eta arkitektura proiektu algoritmikoa. Oinarriak eta proiektu mekanismoak' eta 'PISA azterketako irakurketa probaren analisia eta lanketa bideak' izango dira gaiak.

Ikastaroen azken txanpa ere Eibarren izango da eta uztailaren 9an hasten den astean hurrengoak izango dira ikastaroak: 'Generoaren historia: irakaskuntza tresna', 'Satelite bidezko datu libreen prozesamendua QGIS erabiliz', 'Unibertsitate Ekintzailea eraikitzen: Euskal Herriko eta Latinoamerikako begirada eta proposamenak unibertsitate eta gizarte eragileentzat' eta 'Sexuaren eraikuntza norberarengandik'.

Horretaz gain, aste berean IkerGazte tailerrak egongo dira Elhuyarren Zientzia Azokako irabazleentzat hurrengo programekin: 'Bibliografiaren kudeaketa Zotero (software librea) erabiliz', 'Dibulgazioan hasten eta hazten', 'Norberaren NIA (PLE) osatuz: ikerketarako baliabide digitalak', 'Ahozko komunikazioa errazteko tresnak' eta 'Code erabiltzen ikasteko tailerra'. Ikastaro guztien informazioa eta izenematea www.ueu.eus helbidean topatu daiteke.

Matematikarien topaketa

Bi edo hiru eguneko ikastaroetaz gain, udan zehar arlo profesional zehatz batzuen topaketak antolatu dira. Uztailaren 4an 'Matematikari euskaldunen III. Topaketak' eta 'Geogebra erabiltzaileen II. Topaketak' ospatuko dira Eibarren. Aurretik psikologia eta dokumentazio arloetako topaketan antolatu ziren ere aurtengo programazioan.

Contenido Patrocinado

Fotos

Vídeos