Denon Herria ekimenak bilkurak antolatu ditu datozen egunetarako

26an laugarren urna jarriko da Itziarko hautes barrutian auzo alkatearen hautagaitza bozkatzeko

A.S. DEBA.

Itziarko Auzo Udalaren prozesua bideratu eta antolaketa berria kudeatzeko sortu zen Denon Herria ekimena. Horrela, aurretiaz behin behineko batzordea martxan jarri ondoren, 2015eko hauteskundeen bitartez eratu zen lau urte hauetan lanean aritu den egitura. Hautagaitza herritar bakar eta bateratua aurkeztu zen, Denon Herria ekimenaren izenean tramitatuz hautesle-elkartea, eta batzar antolaketa bidez osatuz lan taldea. Instituzioa parte hartze zuzenaren bitartez modu irekian kudeatzea jarri zen helburutzat horrenbestez.

«Erabat positiboa» da Denon Herria ekimenaren balorazioa lau urte hauetan egindako lanarekiko, «denbora honetan sendotuz joan da antolaketa berria, eta hainbat proiektu eta iniziatiba eraman dira aurrera, zailtasunbak zailtasun».

Bigarren legealdiarekin bat aro berriari ekingo dio Itziarko Auzo Udalak. Orain arte Talde Eragileak egindako lanaren jarraipena izango da oinarria. Izan ere, «hainbat dira hasitako proiektu eta prozesuak, eta funtsezkoa da horiek sendotzea».

Maiatzaren 26an laugarren urna jarriko da Itziarko hautes barrutian. Laugarren urnan auzo alkatearen hautagaitza bozkatzea dagokie Itziarko hautes barrutiko herritarrei, orain dela lau urte bezela. Datozen urte hauek jarraipenekoak izanik, ezagutza eta esperientziari bidea ematea lehenetsi du Denon Herria ekimenak, lan taldea berritzeko. Horrela, legealdi aldaketa baliatuz auzo udalaren dinamika eraberritzeko auzoz-auzo elkartuko dira datozen egunetan. Lau urteren ondoren beharrezkoa omen da «indarrak berritzea eta antolaketa hobetzea».

Alkategaia aurkezteaz gain, antolaketa berriaren osaketa jorratu eta herritarren parte hartzeaz eta asmo desberdinez hausnartuko dute bilkura hauetan.

Gaur Itxaspen

Gaur izango da lehenengo bilkura, 21:00etan Itxaspe Kanpineko kafetegian. Arriola, Egia eta Itsaspeko auzotarrak daude deituta bertara. Ostegunean, Lasturko Tabernan izango da hitzordua, 21:00etan. Lastur-Arbiskoako auzotarrak daude gonbidatuta bertara. Maiatzak 13an, Endoiako lokalean da txanda, 21:00etan, endoiarrei zuzenduta. Maiatzak 16, ostegunean, Elorrixako Lauhaizeta Elkartean jarri dute juntadizoa 21:00etan, Elorrixa eta Mardariko jendearentzat. Azkenik, maiatzak 19an, Burugorri eraikinean egingo da juntadizo orokorra goizeko 11:00etan, eta Itziarko kaleko biztanleez gain beste edozein herritarrek izango du parte hartzeko aukera. Juntadizo guzti hauek modu informalean gauzatuko dira.