Dena prest larunbatean egingo den Euskal Jairako

700 lagunentzako tokia egongo da bazkari herrikoian. /  A. SALEGI
700 lagunentzako tokia egongo da bazkari herrikoian. / A. SALEGI

Marmitako lehiaketan izena emateko epea bihar bukatuko da

ANDER SALEGIDDEBA.

Urtero bezala, iraileko azken larunbatean, Zuhatza Euskara Elkarteak Debako Udalarekin batera ekintzez betetako eguna antolatu du, Euskal Jaia. Egun aproposa izango da herriko jendeak, baserritarrez jantzita, kaleetan zehar jai giroaz gozatzeko. Musika, dantzak, taloak, bazkari herrikoia, marmitako lehiaketa eta erromeria izango dira nagusi egun honetan.

Egitarau zabal bat antolatu da Euskal Jaia ospatzeko eta ekintzak bezperan hasiko dira. Ostiralean, 18:30ean, 'Debako euskararen historia soziala' dokumentalaren aurkezpena egingo da Kultur Elkartean. Zenbait herritarren laguntzarekin egin da dokumentala: Mariaje Aranburuk eta Nekane Goikoetxeak historiaren azalpen eta interpretazioak egin dituzte; Jose M. Etxabe, Itziar Altzibar, Joxe Mari Altzibar, Begoña Arostegi, Maritxu Aizpurua eta Joxe Mari Larramendik euren bizipenak kontatu dituzte; eta Ana Alberdi eta Amaia Otaolak dokumentala grabatzeko lanak egin dituzte. 2015ean abiatu zen Debako Euskararen Historia Soziala ezagutzeko ikerlana. Iñigo Ramírez de Okariz eta Nekane Goikoetxea Unibertsitateko irakasleak aritu ziren buru-belarri lan horretan, emaitza liburu eder batean jaso zelarik. «Behin eta berriz planteatzen zitzaizkigun galderei erantzuteko abiatu zen ikerketa: «Deba esaten duten bezain erdalduna al da? Eta baldin bada, zergatik da? Debak XII. mendetik izan duen historia (ekonomikoki, kulturalki, soziologikoki... izan dituen aldaketak) ezagutu eta horiek euskararen erabileran nola eragin duten ikustea pozgarria izan da, balio izan duelako egindako bidearen handia ikusteko», Gilen Garcia alkatearen iritziz. Emanaldira, interesa duten herritar guztiak gonbidatu ditu alkateak. «Garena ulertzeko, izan garena ezagutzea komeni delako. Eta, are garrantzitsuagoa, izan nahi duguna pentsatzeko, zehazten laguntzeko, eta bidean jartzeko oinarria eman diezagukelako». Eskerrak eman dizkie guztiei lan hau burutzeko erakutsi duten prestutasunagatik. Dokumentala DVD formatuan argitaratu eta etxeetan banatuko da.

Aurkezpenaren ondoren, Kalean Kantuzek herriko kaleak alaituko ditu 20:00etatik aurrera, baina hor ez dira amaituko ekintzak eta gauean, 22:30etatik aurrera, Aldats pilotalekuan Esku Pilota partidak jokatuko dira, parejaka eta lau terdikoak.

Ostiralean 'Debako euskararen historia soziala' dokumentala eskainiko daKuadrilla bakoitzeko bolondres bat eskatu dute antolakuntzatik mahaiak prestatzeko

Larunbatean egun handia ospatuko da eta oso goizetik debako biztanleek talo goxoak dastatzeko aukera izango dute. 11:30ean, joaldunak zarata egiten hasiko dira kalez kale beraien zintzarriekin.

10:00etan Plaza Zaharrean antolakuntzakoek mahaiak ezarriko dituzte marmitako lehiaketan parte hartuko duten parte hartzaileentzat. Zuhatza Euskara Elkarteak, marmitako lehiaketaren bederatzigarren edizioa antolatu du. Parte hartu ahal izateko aurrez izena eman beharko da turismo bulegoan. Izena emateko epea bihar, osteguna, bukatzen da. Turismo Buleoan eman behar da izena. Parte hartzaile bakoitzak sua, kazuelak, atuna, patata etab eraman beharko ditu. 14:30etarako marmitako plater bat aurkeztu beharko da, prestatu duten toki berean. Talde bakoitzeko bost kidek sagardoa doan izango dute herri bazkarian (edalontziak emango zaizkie). Sari banaketa, bazkal ostean egingo da Aldats pilotalekuan.

12:30etan dantzarien unea iritsiko da, Gure Kai Dantza taldea eta Musika Eskolako dantzariak kalez kale ibiliko dira. 13:30ean, erraldoien agurra egingo da Foruen plazan.

Bazkari herrikoia 15:00etatik aurrera, berriro ere Aldats pilotalekuan izango da. Bertan 700 lagunentzako tokia egongo da. Platerak eta mahai tresnak antolakuntzak jarriko ditu, baina norberak bere bazkaria eraman beharko du. Txotx edalontzia salduko da bost euroren truke eta sagardoa nahi beste izango da. Kafea eta kopak hartzeko aukera eskainiko du Zuhatza Euskara Elkartea.

Boluntarioak beharko dira egun honetan ekintzak burutu ahal izateko, 9:30ean mahiak jarri eta antolatzeko. Kuadrilla bakoitzetik kide bat hurbiltzea eskatzen dute antolakuntzatik. 11:30etatik aurrera soilik hartu ahal izango da lekua bazkarian.

Mugi Panderoa erromeria taldea arduratuko da egun honi azken jai giroa ematen. 20:00etatik 21:30etara eta ondoren 23:00etatik 01:30etara dantza egiteko aukera eskainiko dute berain musikarekin.