Aurtengo jaiak «oso onak» izan dira bizilagun askoren aburuz

Su ta Gar taldeak plaza jendez bete zuen. /  A.Z.
Su ta Gar taldeak plaza jendez bete zuen. / A.Z.

Euria egin zuen bi egunak izan dira onenak lagun askorentzat

AMAGOIA ZABALAMENDARO.

Aurtengo Santana jaixei buruzko udal balorazioa oraindik jakiteko dago, baina jendearen iritzia ere jaso da eta jendearen arabera, oso jai onak izan dira. Santana eta kuadrilen egunean euria egin bazuen ere, justu bi egun hauek «onenak» izan direla aitortu dute lagun askok.

Santanako erromeixia Garagartzako elizpian egin zen eta ondoren, ohi den bezala, triki poteo herrikoia izan zen, kale eta tabernetan festa giro ikusgarria sortu zelarik.

Kuadrilen egunean, oso giro ona sortu zen. Su Ta Gar taldeak eskainitako kontzertua «ikaragarritzat» jo du jende askok eta gau horretan jende asko hurbildu zen herrira. Gainera, Mendaroko Ester eta Pius djak oso ondo bete omen zuten lana eta plaza goizaldera arte lepo beteta egon zen.

Bi egun hauez gain, jendearen ahotan ibili da ere aurten lehen aldiz Santixau egunean Udalak, Azpilgoetan, jarri zuen urezko tobogana. Demaseko arrakasta izan zuen eta jende asko frogatzeko gogoz gelditu da.