Udal Pilota ikastaroa eskainiko da hurrengo ikasturtean ere herrian

Pilota. Ederki pasatzen dute haurrek pilota eskolan. /  GALILEA
Pilota. Ederki pasatzen dute haurrek pilota eskolan. / GALILEA

GALILEAEZKIO.

Arrakasta handia izan du Udal Pilota ikastaroak aurten Ezkion, honetan hamalau bat haur eta gaztetxoek parte hartu dutelarik, eta hurrengo ikasturteari begira ere aurrera eraman nahi da, honetarako izena emateko epea zabalik dagoelarik.

Ezkioko frontoian 5 urtetik 16 urte bitartekoentzat pilota ikastaroa iaz sortzeko egitasmo arrakastatsuak aurrera egin ondoren, datorren ikasturteari begira ere 2019-2020 denboraldiko matrikulazioari ekin diote Ezkioko Pilota Eskolako (EPE) kideek, aurre izena ematea zabalik dagoelarik.

Horrela, hurrengo ikasturteari begira ondorengo ordutegia proposatzen dute, astean ordu beteko saioa izango litzatekelarik, ostiraletan: 5-9 urte bitarteko haurrak arratsaldeko 17:00etatik 18:00ak bitartean elkartuko lirateke; eta 9-16 bitartekoak arratsaldeko 18:00etatik 19:00ak bitartean.

Pilota eskolaren iraupena zortzi hilabetekoa izango da: urriaren 4an hasiko dira martxan eta maiatzaren 29ra arte aurrera eramango da. Haur bakoitzeko prezioa 40 eurokoa izango da eta urriaren lehen astean parte hartu nahi duen orok izen-emate fitxarekin batera ordainagiria eraman beharko du ikastarora. Ezkioko pilotalekuan aurrera eramaten da.

Izena eman

Aurre izena ematea zabalik dago dagoeneko eta honetarako, hemendik irailera arte jakinarazi beharko da ezkiokopilota@gmail.com helbidean haurraren izen abizenak eta adina adieraziz edo EPE (Ezkioko Pilota Eskola) taldeko kideren bati jakinaraziz ere.