«Txikitatik amestutako eguna izan zen asteartekoa» Aranburu

Podiuma. Getxoko zirkuitoan, Aranburu txapelduna. /  A.A.
Podiuma. Getxoko zirkuitoan, Aranburu txapelduna. / A.A.

Alex Aranburu Txirrindularia |

MIRYAM GALILEA EZKIO.

Ordiziako klasikan izan genuen orain dela gutxi Alex Aranburu. Honek, etxe ondoan egonda, senide eta lagunez babestuta, postu txukuna lortu zuen, baina asteartean saltoa eman zuen eta Getxoko Zirkuitoan lehenengo postua eskuratu zuen. Hiru urte dira ezkiotarra profesionalen munduan lanean dabilela eta zuziri baten modura goruntz doa ziztu bizian. Urteetan bere ibilaldia jarraitu ondoren, lehen postu hau nola bizi izan duen berarekin partekatu nahi izan dugu.

-Profesionaletan lehenengo aldiz txapelduna! Helmuga zeharkatzeko momentu horretan zer pasatu zaizu burutik?

-Txikitatik amestutako eguna izanzen asteartekoa! Lan askoren fruitua, esaten den bezala... Politte izan zen oso eta gustura egon nintzen gainera! Sinistu ezinda ibili nintzen.

-Nola bizi izan duzu lasterketa?

-Karrera berezia da Getxokoa... Egun osoa kale artean eta kurba artean ibili ginen! 18 kilometroko zirkuitu bati hamar bira eman genizkion!

Taldekideek oso karrera ona egin zuten. Lehenengo, Justin Oien joan zen ihesaldian. Karrera kontrolatzen Movistar eta Murias ibili ziren eta, azken hiru biratan, ihesaldia oso gertu zegoenez, beste taldekideek ihesari eman zioten. Alde guztietatik atakatzen eta Movistarri lanak zailtzen. Azkeneko aldapan, esprintean hanka onakin nindoan eta horrelaxe irabaztea lortu nuen. Noruegan ia hirugarren postua egin nuen antzeko helmuga batean eta hemen garaipena etorri da.

-Aurretik Ordizian egon zinen lehian, eta honetan ere etxekoak gertu izan dituzu... Bapo ospatu dezute?

- Bai, Ordizin eta hemen etxekok animatzen izan dira: Ezkioko peñakoak, neska, familikoak... Eta bai ta ospatu ere bai! Atzo lehengusu artean afaritxo bat egin genuen elkartean eta gustura ibili ginen!

-Beti zure inguruan taldekide bikainak dituzula aipatzen duzu. Gehienetan hauei laguntzen aritu izan zara txapelketetan. Zure txanda izan da oraingoan?

-Batzuetan laguntzea tokatzen zait baina nire aukerak ere ematen dizkidate! Asteartekoan bukaerarako gordetzeko esan zidaten eta hala egin nuen. Zortez, egun ona izan nuen.

-Zer suposatzen du txapelketa bat irabazteak?

-Lanean jarraitzeko gogo gehiago ematen du, ez? Eta profesionaletan lasterketa bat irabaztea ezinezkoa ez delaz ere ohartzen zara! Saiatuz gero, lortu daiteken gauza bat dela.

-Zer esan dizute taldean? Movistar faboritoa izanik, zure izena lehenengo lerroetan azaldu da oraingoan!

-Bai, azkenen Carlos Barbero zen faborito nagusia eta gero Jon Aberasturi, bi esprinterrak... Barbaerok beste bi aldiz irabazita zeukan karrera hau, baina, bueno... Horrelako helduerak ondo etortzen zaizkit eta indartsu iritsi nintzen bukaerara.

-Zeinentzako izan zen lehenengo besarkada helmuga gurutzatzerakoan? Bertan lagunak, familia... egongo ziren.

-Lehenengoa, afizionatuetan nire zuzendaria izandako Gaztañagari eman nion! Hantxe zegoen Euskadi Fundazioko masajista bezala eta beregana joan nintzen. Familikoak pixka bat beherago zeuden eta geroxeago egon nintzen beraiekin.

-Hemendik aurrera? Oporrak edo txapelketa gehiago dituzu hurrengo asteetan?

-Orain karrera politak datoz: Klasika Donostia larunbatean, 'Vuelta Burgos' eta Vuelta España aurten! Bide onetik noala ematen du, ea han ere emaitza politen bat lortzea izaten dudan!

 

Fotos

Vídeos