Sagardo Festarekin hasiko dira ostiralean aurtengo Madalenak

Paella. Aurten ere paella erraldoia egingo dute ostatukoek. / GALILEA
Paella. Aurten ere paella erraldoia egingo dute ostatukoek. / GALILEA

Ostiral eta larunbat arratsaldean ekitaldiak izango ditugu auzoan, astelehenean Madalena egunean egitaraua itxiz

MIRYAM GALILEAITSASO.

Ostiralean hartuko dute martxa aurtengo Madalena jaiak Alegia auzoan, hiru egunetan zehar ekintzez jositako egitaraua aurrera eramango delarik: hasteko Sagardo festa bikainaz gozatzeko aukera egongo da ostiral arratsaldean; ondoren dantza, musika edota haurrentzako ekitaldiak ere ez dira faltako.

Arratsaldeko 19:30ean Sagardo festak irekiko du Madalenatako aurtengo jai egitaraua, honetan sagardo desberdin ugari dastatzeko aukera izateaz gain, pintxoak hartzeko aukera ere egongo delarik. Ondoren, Dantzaki taldearen dantza erakustaldia eta afari herrikoia ez dira faltako, azken hau sagardo festaren jarraipen gisa, oilaskoarekin. Azkenik, eta eguna borobiltzeko, Joselu Anaiekin dantzaldia egongo da.

Larunbatean arratsaldean berriro ere piztuko da giroa auzoan, 18:00tik aurrera 'Paella Erraldoia' nola egiten den ikusgai izango delarik. Itsasoko Ostatuko Manu eta Aidak sukaldatuko dute, osagai nagusia untxia izango delarik (Euskal Untxia, Iñaki Alberdiren babesarekin).

Behin guztia prest dagoenean, Herri Afaria hasiko da. Honetan parte hartzeko eta paella prestatu ahal izateko aldez aurretik izena eman beharko da, eta honetarako txartelak salduko dira ohiko tokietan: helduek 15 euro ordainduko dituzte eta gaztetxoek 10. Afaria amaitzerakoan bingo herrikoia hasiko da, opariekin, eta DJ Gorrotxa ere musika jartzen izango dugu.

Astelehenean Madalena Eguna ospatuko dute auzoan, honekin jaiei agur esanez. Eguerdian izango da meza elizan, bukaeran Izazpe abesbatzaren emanaldi laburra eskainiko da, eta jarraian Gabiriko Goruntz dantza taldearen erakustaldia ez da faltako. Saioa amaitzerakoan hamaiketako herrikoia eskainiko da plazan. Arratsaldean, haur eta gaztetxoentzako puzgarriak egongo dira. Nola ez, edaria, dastaketa eta musika ere ez dira faltako jaiak agurtzeko.

Batzar orokorra, Oreña

Ezkio eta Itsasoko Oreiña elkarteko Batzar Orokorra ostirala honetan egingo da, hilak 19, arratsaldeko 20:00etan Anduaga Elkartean (Santa Lutzi-Ezkio).

Batzarrean azalduko den gai zerrenda ondorengoa izango da: aurreko bileraren aktaren onarpena; Federazioaren urteko informazioa; 2018ko kontuen onarpena; bazkideekin erlazionaturiko gaiak; ehiz postuetako erabilpenaren gestioa eta federazioaren aurreko tramitzioa; eta herritarren postuetaz onuratuko diren bikoteen izen ematea eta eraiki beharreko postuen banaketa.

Gaien garrantzia dela eta batzarrera joatea ezinbestekoa dela gogoratzen dute Oreiñakoek.