Nathalia Heim-en 'Lurraldeak [Territorias]' erakusketa azaroa arte

Emakumeak. Proiektuko emakume protagonistak, Natheim (kartela eskuetan) artistarekin. / GALILEA
Emakumeak. Proiektuko emakume protagonistak, Natheim (kartela eskuetan) artistarekin. / GALILEA

Erakusketa museoko interpretazio zentroan kokatuta dago eta azaroaren 30a arte bisitatu ahalko da

MIRYAM GALILEAEZKIO.

Uda honetan Ezkioko Igartubeiti baserri museoak PATRIM+ sareko mugaz gaindiko egonaldi artistikoen programan parte hartu izan du. Honetan, Nathalia Heim artista argentinarra Ezkioko baserri museoan egon izan da hilabete batez, Urola Garaia eta Goierriko emakume desberdinak ezaugutu eta elkarrizketatu dituelarik. Ondorioz, 'Lurraldeak [Territorias]' lana osatu du, emakume hauen esperientzi eta esentzia argazkien bidez irudikatuz. Erakusketa irailaren 12an inauguratu zen eta azaroaren 30a arte egongo da interpretazio zentroan ikusgai.

Egonaldi hau, Gipuzkoan antolatzen den mugaz gaindiko lehenengoa, kultur ondarea praktika artistiko garaikideekin uztartzen duen museoaren lan ildoan txertatzen da. «Gaurkotasunetik museoaren gaiak berrikustea eta ezaguera berriak sortzea da asmoa, PATRIM+ egonaldiari dagokionez, landa inguruneko emakumearen paperaren inguruko hausnarketatik abiatuz», azaltzen zuen Kizkitza Ugarteburuk, Igartubeiti baserri museoko arduradunak. Jarduera honek pertsonak beraien lurraldean ikusgai izan daitezen eta arte prozesuetan parte hartzea sustatzeko mugaz gaindiko lankidetza dinamikak sortzea du helburu.

Emakumea eta lurraldea

Proiektua azaldu, emakumeak bilatu, elkarrizketak landu historia eta istorioak ezagutzeko, eta azkenean argazkiak egin eta aproposa eta zentzua duen hori aukeratu, bakarra, 'Lurraldeak [Territorias]' erakusketa osatzeko.

Nathalia Heimek, emakume bakoitzak bere historiarekiko eta ingurunearekiko ezartzen dituen emozio eta loturen argazki erretratuen forman, itzulpen poetikoa burutu du.

Egonaldia hasi eta 30 egunez, Urola Garaiko eta Goierriko 18 emakumeri elkarrizketak eta argazkiak egin zizkien Natheim (Nathalia Heim) artistak. Ondoren, eta beste aukeraketa lan bat eginez, erakusketa osatu du Igartubeitiko Interpretazio zentroan: borobil bat osatuz, emakume bakoitzak eramandako egurrezko aulkiaren gainean bere argazkia kokatzen da; bakoitzak sentsazio, sentimenduedo egoera bat adierazten du. Erakusketarekin batera kartografia bat ere burutu du artistak, honetan emakumeek elkarrizketatatan adierazitako testura, aroma, soinuak edota santsazioek osatzen duten mapa argazkien bitartez ere osatuz.

Erakusketa irailaren 12an inauguratu zen, egun honetan erakusketa bera zabaltzearekin batera, 18 emakume protagonistek performance dotore bat eskaini zutelarik. Eta azaroaren 30a arte egongo da bertan ikusgai. «Igartubeiti eta gero erakusketa mugitu egingo da, baina ondorengo lekuak oraindik ezin ditugu argitu», adierazten du Nathalia Heim artistak.

Patrim+

Igartubeiti baserri museoa, PATRIM+-en, mugaz gaindiko museo, ekomuseo eta interpretazio zentroen ondare sarearen partaide da. Sarearen helburua, garapen jasangarriaren ikuspuntutik Pirineoetako bi aldeen ondare natural eta kulturala balioan jartzea da. Sare honetan Ariège, Haute-Garonne, Hautes-Pyrénées, Euskadin, Aragoin eta Kataluinian kokatutako kideek parte hartzen dute. 2017an proiektuak POCTEFA finantziazioa lortu zuen lau urtetarako, 2021 arte.