Mahai jokoetan lagunekin aritzeko aukera bihar frontoi ondoko lokalean

GALILEA EZKIO.

Ezkioko Udalak sustaturik eta Antzuolako jolasenea elkarteko kide den Lizarrako Juanma Begiristain-ren laguntzaz, abenduaren 29an (bihar) arratsaldean Mahai Joko desberdinetan aritzeko aukera egongo da herriko pilotalekuaren ondoan dagoen lokalean.

Arratsaldeko 16:00etan hasiko dira jolasak eta iluntzeko 20:00ak arte hauetan parte hartzeko aukera izango dute adin guztietako herritarrek. «Gehienok ezagutzen ditugun mahai jokoez gainera, joko aukera zabala dago gaur egun: Catan, Carcassonne, Sushi go!, Dixit, Rhino Hero, F1...», diote Udaletik.

Jolastera gerturatu

Horrez gero mugikor, tablet eta abarrak pixkatean itzali eta joko hauek ezagutu eta jolastera gerturatzeko deialdia luzatzen diete ezkiotarrei oraingoan. «Haur, gazte, heldu... denontzako egongo da aukera», diote.

Horrela bihar larunbata, arratsaldeko 16:00etatik aurrera Ezkion, goiko kaskoan pilotaleku ondo lokalean hitzordua izango dute herritarrek.

Festa hauetan elkartu eta guztiok elkarrekin ederki pasatzeko aukera zabaltzen delarik herrian oraingoan ere.