Lurraldeak-Territorias erakusketa bizia

Protagonistak. Hemezortzi emakumeen erretratu poetikoekin osatu du Nathalia Heimek erakusketa. / ARGAZKIAK GALILEA
Protagonistak. Hemezortzi emakumeen erretratu poetikoekin osatu du Nathalia Heimek erakusketa. / ARGAZKIAK GALILEA

Patrim+ egonaldi artistikoaren emaitza da erakusketa, eta azaroaren 30a arte ikusgai egongo da

MIRYAM GALILEAEZKIO.

Uda honetan Ezkioko Igartubeiti baserri museoak, Chateau de Seix (Courserans) eta Espacio Pirineos-ekin batera (Graus, Hueska), PATRIM+ sareko mugaz gaindiko egonaldi artistikoen programan parte hartu du. Prozesu hau Ezkioko Igartubeiti Baserri Museoan irailak ireki berri den eta azaroak 30 arte ikusgai izango den Nathalia Heim artista bisualaren 'Lurraldeak [Territorias]' erakusketarekin amaitzen da, hau ostegunean inauguratu zelarik; Gipuzkoan antolatzen den mugaz gaindiko lehen egonaldia da.

Hogeita hamar egunez, Urola Garaiako eta Goierriko 18 emakumeri elkarrizketak eta argazkiak egin zizkien Natheim (Nathalia Heim) artistak. «Helburua, normalean landa inguruneko emakume moduan ulertzen dena auzitan jartzea izan zen, bakoitzaren historia pertsonalean barrena eginiko ibilaldi baten bitartez», azpimarratu du Nathalia Heim artista bisualak.

Nathalia Heimek, emakume bakoitzak bere historiarekiko eta ingurunearekiko ezartzen dituen emozio eta loturen argazki erretratuen forman, itzulpen poetikoa burutu du bere azken lana izan den honetan.

Erakusketa

Erakusketaren inaugurazio ofiziala ostegunean goizean ospatu zen Donostian; eta arratsaldean, ekitaldi berezi batekin emozioz bete zen Igartubeiti Baserria. Bertako inaugurazio honetan, lanaren protagonistak izan diren 18 emakumeak elkartu ziren eta gonbidatutako lagun eta senideak, prestatutako «performance» baten bitartez proiektuaren partaide bilakatu zituzten. Hotsetatik, ahotsetara pasa eta hitzetara helduz, doinu, soinu, abesti eta dantzez osatutako performance-a irudikatu zuten dolarean. Jarraian Intepretazio zentrora gerturatu ziren bertaratutako guztiak argazki erakusketa ezagutzera.

Borobilean kokatutako hemezortzi aulkiek osatzen dute erakusketa, emakume bakoitzak berea aukeratu duelarik, eta gainean norberaren erretratua, Nathaliak elkarrizketa sakon baten ondorioz aukeratutako argazkia. «Elkarrizketan galdera ugari egin izan nituen, orokorrak batzuetan eta sakonak bestetan: musika bat, usain bat, kaxatxo batean sartuko zenuen altxorra... eta jasotako emozio, hitz eta informazioarekin argazkiak egin genituen, horietatik bat aukeratuz, esanguratsuena».

Argazkien erakusketarekin batera kartografia edo mapa berezi bat ere burutu du artistak: «Kartografia honetan ez daude kontinenteak, mapa berezi eta bizi bat da. Emakumeek adierazitako testura, aroma eta soinuak adierazten dituzten argazkiekin osatutako lan bat da. Obra bizi bat da azken finean», azaldu du Natheim artistak.

'Lurraldeak [Territorias]' erakusketa hau ikusgai dago Igartubeitiko Interpretazio Zentroan dagoeneko eta azaroaren 30a arte hau bisitatzeko aukera egongo da. Ondoren, beste museo batzuk ere bisitatuko ditu.