Korrika Txikia heldu da eskolara

Korrika. Bi kilometro inguruko ibilbidea osatu zuten eskolako guraso, irakasle eta haurrek./GALILEA
Korrika. Bi kilometro inguruko ibilbidea osatu zuten eskolako guraso, irakasle eta haurrek. / GALILEA

MIRYAM GALILEAEZKIO.

Itsasoko Alegi auzoko errotondatik abiatu zen atzo Ezkio eta Itsasoko Herri Eskolako Korrika Txikia. Guraso, irakasle eta, nola ez, eskolako haurrek parte hartu zuten honetan, eguraldiak lagundu ez zuen arren, gustura eta gogoz aritu zirelarik.

Norberak margotutako petoa soinean eta irrifarrak aurpegietan, korrika egiteko prest azaldu ziren arratsaldeko 15:15ean guraso, irakasle zein haurrak. Korrika Txiki honetan bi kilometro inguruko ibilbidea osatu zuten guztira. Itsasoko errotondatik gurasoak abiatu ziren, Batirtze Gabilondo eta Asier Sasietak lekukoa eraman zutelarik; aurrerago irakasleen txanda iritsi zen lekukoa Miren Hernandezek eta Arantza Gonzalezek jaso zutelarik; eskola parean 6-7 urteko ikasleak zeuden zai eta Maier Artolazabal eta Haizea Ugarteburu izan ziren lekukoa hartzearen arduradunak. Aurrerago eta bidegurutzean buelta eman eta berriro ere eskolako bidea hartuz, 4-5 urteko Maddi Egeak eta Maier Igartuak korrika ibili ziren lekukoarekin. Jarraian, hiru urtekoen txanda iritsi zen, Haizea Gabilondok eta Mattin Ugarteburuk hartu zutelarik eta, azkenik, geratzen ze ibilbidea bi urtekoen esku geratu zen, hauek gustura asko eskolaraino iritsi zirelarik.