San Joan bezperako topaketa prest dute jada ezkiotarrek

San Joan. Afari herrikoia eliz atarian ospatzen da. /  GALILEA
San Joan. Afari herrikoia eliz atarian ospatzen da. / GALILEA

GALILEAEZKIO.

Gau berezia dugu ekainaren 23koa, San Joan bezpera, sua, sorginak, musika eta festa giroa herrira ekartzen dituena. Haurrentzako tailerra, afaltzeko elkartu, lagun artean gustura egon eta gaua egin bezain pronto suaren berotasunaz gozatu. Aurten ere ospakizun berezia antolatu dute ezkiotarrek egun honetarako eta ordurako dena prest dute dagoeneko.

Urtero aurrera eramaten duten bezala oraingoan ere San Joan bezperako sua piztuko dute San Migel eliza parean, solstizio berriari elkartasuna, osasuna eta ongizatea eskatuz, eta honen inguruan festa giroa izango da herrian.

Yartu Kultura Elkarteak eta Ezkioko Udalak antolatuta, hurrengo asteko igandean suaren inguruko festa aurrera eramango da Ezkioko eliz atarian, bertan haur, gazte eta helduak elkartuko direlarik.

Egitaraua

Arratsaldeko 18:30ean elkartuko dira umeak eliz-atarian Olazabalgo Junkalen gidaritzapean sutarako panpinak prestatzeko, eta ordu erdi beranduago ipuin-kontaketa hasiko da. Leire Zinkunegik 'Barrurago sakonago' ipuina kontatuko du.

Ondoren, afari herrikoia hasiko da. Urtero egiten den bezala, bakoitzak bere afaria eta edaria eramango ditu eta atarian kokatutako mahaietan elkartuko dira guztiak.

Jarraian, gaueko 22:00etan suaren festa hasiko da: kanpaiak gogoz joka, suziriak, txalaparta, suaren piztea, sorgintxoen dantza, su jauziak, queimada, txokolatea eta bizkotxoa ere ez dira faltako.

Tradizioa mantenduz, zaharra eta txarra desagertzeko asmoz ere ezin da ahaztu San Joan bezperak ematen duen aukera. Beraz, sutara bota nahi den guztia ez ahaztu eta egun honetan eraman.