Itsaso 2030 plan estrategikoa lantzen hasi dira herritarrak

Bozketa. Landu beharreko arlo nagusiei botoa ematen. / ITSASO A.B.
Bozketa. Landu beharreko arlo nagusiei botoa ematen. / ITSASO A.B.

MIRYAM GALILEAITSASO.

Aurreko asteburuan azken Herri Batzarra aurrera eraman zen Itsason. Anitzak izan ziren bertan jorratutako gaiak, hauen artean Itsaso 2030 plan estrategikoa aurkitu zelarik.

Itsasoren etorkizunari begira, badira hilabete batzuk plan estrategiko bat egitearen beharra azaldu zela batzordetan, hemendik hamar urtera begira Itsasok nolakoa izan beharko zuen irudikatzen duena, hurrengo urteetan aurrera eman beharreko politiken eta inbertsioen iparrorratz izanik.

Udaletik gogoratzen dutenez, Foru Aldundiko diru-laguntza baten bitartez lortu ziren prozesu hau martxan jartzeko funtsak eta Siadeko enpresa aholkulari gisa aukeratu zen bidelagun, prozesuaren gidaritzan lagun zezaten.

Horrela, aurreko larunbatean ospatutako Herri Batzarra izan zen plan estrategiko honen abiapuntua, auzo desberdinetako hainbat herritar proiektuaren nondik norakoak ezagutzera inguratu zirelarik.

Siadekok egindako aurkezpenean ezagutu ziren prozesuak izango dituen pauso desberdinak. «Hasteko, gaur egun zer garen definitu eta etorkizunean zer izan nahi dugun irudikatu. Horretarako hainbat lantalde osatuko dira hurrengo asteetan, herritar eta batez ere herriko gazteen partehartzea nabarmendu nahi delarik. Lantalde horiek gai desberdinak tratatuko dituzte: Hirigintza eta Etxebizitza, Enplegua eta Tokiko Ekonomia edo Herri Bizitza bezalako lanketatan barneraturik», azaltzen dute Udaletik.

Lehen pausoak

Herri Batzarrean lehen pausoak eman ziren, orduan parte hartu zuten guztien iritziak jaso ziren eta plan horrek izan behar dituen lehentasunen lehenengo definizioa ere egin zuten.

«Gerturatu zen orok sei gometsa zituen, hiru urdin eta hiru gorri eta bakoitzaren interes pertsonaletik eta herriaren ikuspuntutik hurrengo hamar urteetan landu beharko liratekeen arlo nagusiak bozkatzeko aukera izan zuen», diote.

Datozen egunetan, lanarekin jarraituz, inkesta zabalago bat banatuko da herritar guztien artean, arlo hauetan sakontzeko eta gerturatu ezin izan zutenen iritzia ere jasotzeko.

Udaletik azpimarratu nahi dute, prozesu honetan guztian, denen iritzia jaso eta herritar guztien partehartzea bermatu ahal izatea dela helburu nagusienetako bat, «guztion artean irudikatu dezagun etorkizuneko Itsaso».

Sortu behar diren lantaldeek emandako pausoak ezagutzeko irailan eta abenduan ospatuko dira berriro Herri Batzarrak, eta handik ondorioztatutakoarekin egingo litzateke hurrengo urteetan gidaliburu izan beharko lukeen plana.