Iruñea 40 ezkiotarrek bisitatuko dute gaur

Talde polita elkartzen da urtero. / GALILEA
Talde polita elkartzen da urtero. / GALILEA

MIRYAM GALILEAEZKIO.

Urtero, uda garaian, txango berezi bat antolatzen dute herrian, herriko Udalaren eta Yartu kultura elkartearen eskutik. Irteera uztaila erdialdetik aurrera izaten da eta honetan adin desberdinetako herritarrek parte hartzen dute. Aurrekoan Ataun hobeto ezagu-tzeko aukera izan zuten parte har-tzaileek eta oraingoan aukeratutako txokoa Iruñea izan da, txangoa gaurko egunean zehar aurrera eramango delarik, eta honetan 40 ezkiotarrek hartzen dute parte.

Euskal Herriko txoko desberdinak herritarrak elkarrekin ezagutzeko asmoarekin antolatzen dira txangoak eta arrakastatsuak izaten ohi dira. Oraingo honetan Iruñeako planetarioa eta hiriaren historia eta txoko bereziak ere ezagutuko dituzte bisita gidatu desberdinen bitartez.

Goizeko 10:00etan Anduaga industrialetik (Euskorot) paretik abiatuko dira gaur herritarrak Iruñeako bidea hartuz. Hirira heldu eta lehenengo geldiunea egingo dute, eguerdi partean Planetarioa bisitatuz.

Exoplanetak ezagutu

Celeste neskatilaren eskutik exoplanetak ezagutuko dituzte filma baten bitartez; zeruaren zuzeneko azalpena ere jasoko dute eta azken albiste astronomikoak ez dira faltako. Bisita amaitu eta Catachu jatetxean bazkalduko dute, ondoren hiria ezagutzeko momentua iritsiko delarik. Jende kopurua kontutan hartuz, bi talde egingo dira bisita gidatuaz gozatzeko: 16:30ean hasiko da lehenengo taldearen bisita, Gaizka Arangurenen azalpenekin, eta 18:00etan izango da bigarrena. Arratsaldeko 19:30etan Ezkiora bueltatuko dira.