Lau ikastaro eskainiko dira herrian ikasturte honetan

Pilota. Haurrentzako pilota ikastaroa Ezkioko frontoian aurrera eramango da.
/GALILEA
Pilota. Haurrentzako pilota ikastaroa Ezkioko frontoian aurrera eramango da. / GALILEA

Zumba, pilates eta TaiChi izango dira oraingoan ere eta haurrentzako pilota gehitu da zerrendara

MIRYAM GALILEA EZKIO.

Udako oporrak amaitu eta hilabete berria hastearekin batera, ikasturteko ikastaroen eskaintza zabaldu du Udalak, hauek urrian hasiko direlarik.

Adin guztiei zuzendutako ikastaroak hiru izango dira, azken urtetan aurrera eraman direnak eta oso arrakastatsuak herritarren artean, zumba, pilates eta tai-chi dira hain zuzen, astean behin klase bat izango delarik. Hauetaz aparte aurten haurrek pilota ikastaroan parte hartzeko aukera izango dute.

Tai Chiren kasuan finkatuta dago eguna, eta honetan parte hartu nahi dutenak ostiralean elkartuko dira, arratsaldeko 19:00etatik 20:00etara. Ikastaro honen kuota 20&euro hilabetean izango da.

Zumba eta pilatesi dagokionez, izena emateko epea zabalik dago dagoeneko eta behin hau amaituta, interesdunen artean bilera bat egingo da ordutegia eta eguna finkatzeko. Bi ikastaro hauen kuota ere 20 eurokoa izango da.

Hiru ikastaro hauetako batean (edota bat baino gehiago) izena emateko epea zabalik dago dagoeneko eta iralaren 15ean itxiko da. Interesdunek Udaletxeko 943 72 13 03 telefono zenbakira deitu beharko dute. Gogorarazten da gutxienezko kopurua ikastaroa aurrera eramateko 8 pertsonakoa dela eta klaseak urrian hasiko direla.

Haurrentzako pilota

Lehenengo aldiz herrian, Udalak sustatuta, haurrentzako pilota ikastaroa antolatu da ikasturte honetarako, bertan 6 eta 16 urte bitarteko umeek parte hartzeko aukera izango dutelarik. Pilota ikastaroa Ezkioko frontoian aurrera eramango da eta astean ordu beteko saioa proposatzen da, ostiraletan 17:00etatik 18:00etara. Ikastaroa zortzi hilabetekoa izango da, urriaren 5ean hasi eta maiatzaren 31an amaituko delarik; prezioa 40&euro umeko. Aurre inskripzioa egiteko, irailan zehar umearen izen-abizenak eta adina ezkiokopilota@gmail.com helbidera bidali beharko da edota EUP! (Ezkio Udal Pilota Ikastaroa) taldeko edonori helarazi. Ikastaroa hasi aurretik bileratxo bat egingo da izena emateko fitxa betetzeko, ordainketa non eta nola egin azaltzeko, eta beste zenbait gai zehazteko.

Contenido Patrocinado

Fotos

Vídeos