Haurrentzako jolasekin hasiko dira San Pedroak

Mus txapelketa. Aurten ere ez da faltako Santa Lutzia auzoko San Pedro jaietan.
/GALILEA
Mus txapelketa. Aurten ere ez da faltako Santa Lutzia auzoko San Pedro jaietan. / GALILEA

Arratsaldean emango zaie hasiera gaur jaiei eta bihar egun handia ospatuko dute, ekintza ugarirekin

MIRYAM GALILEAEZKIO.

Arratsaldeko 16:30ean hartuko dute ekitaldiek martxa gaur arratsaldean, aurtengo San Pedro jaiei hasiera emanez eta bi egunetan zehar ederki pasatzeko aukera izango dute adin guztietako herritarrek.

Txikiekin giroa pizten hasi eta arratsaldeko 18:30ean auzoko tabernetatik pintxo pote musikatua egingo da. Arratsaldeko azken orduan txapelketa desberdinak hasiko dira: futbolina eta musa.

Azken urteetan arrakastaz aurrera eraman den futbolin txapelketa izango dugu aurten ere arratsaldeko 20:00etatik aurrera Anduaga Etxean; eta bestetik, ohikoa den Mus txapelketa 21:30ean hasiko da.

Gauean festarekin jarraitu nahi dutenek, afaltzeko ogitartekoak erosteko aukera izango dute Ganbara Guraso Elkartearen eskutik, eta 23:00etan Mugi Panderoa taldearen kontzertua eskainiko da, eguna borobilduz.

San Pedro eguna

Jaietako egun handia ospatuko dute bihar ezkiotarrek. Goizeko 11:00etan meza nagusia ospatuko da elizan, Ezkio eta Itsasoko Izazpe abesbatzaren parte hartzearekin. Eta jarraian Gabiriako Goruntz dantza taldearen saioa plazan. Ohitura jarraituz, luntx herrikoia egingo da karpan. Bazkaltzen amaitu eta arratsaldeko 17:30ean jarraituko du egitarauak, puzgarriak eta futbolin txapelketaren finala izango ditugularik. Jarraian, Ezkioko festatan aurrera eraman izan zuten bezala, Herri Kirol desafioa hasiko da. Amaitzerakoan, Toka Txapelketa ospatuko da Santa Lutzian.

Eta eguna borobiltzeko eta baita auzoko jaiak behar bezala amaitzeko ere, bihar herri afaria izango da Santa Lutziko plazan. Giroa alaitzeko Iñaki eta Elorza trikitilariak izango dira afal ondoren. Eta goizaldean, bingo eta txokolatea ere ez dira faltako aurtengo San Pedro jaiak behar bezala agurtzeko.