Bi Ezkutuko altxor bisitatzeko aukera izango dira hil honetan

MIRYAM GALILEA EZKIO.

Ignaziotar lurraldea sakon-sakonean ezagutzeko aukera ematen duen 'Ezkutuko Altxorrak' bisita gidatuen egitaraua aurrera doa, eta hilabete honetan Urola Garaian kokatzen diren bi ekintzetan parte hartzeko aukera zabaltzen digute, Debagoiena eta Urola Erdiko beste batzurekin batera.

Bisita hauek XVI. mendea eta Loiolako San Ignazio ardatz moduan hartzen dute. Oso ezagunak ditugu Loiolako Santutegia, Antioko ermita, Arantzazuko Santutegia... Izan ere, ignaziotar lurraldean historia, arte eta kultura arloan aurki dezakegun ondare aberats eta ugariaren harribitxietako zenbait dira hauek.

Baina Gipuzkoako Debagoiena, Urola Erdia eta Urola Garaia eskualdeetako XVI. mendeko beste hainbat harribitxi ez dira hain ezagunak: Ezkioko Igartubeiti, Azpeitiko Bakardadearen kapera, Zumarragako San Kristobal ermita... eta hauek hobeto ezagutzeko aukera zabaltzen digu Ezkutuko Altxorrakek.

Antio eta Igartubeiti

Hilabetero, bigarren asteburuan antolatzen dira bisita berezi pare bat gutxienez bailara bakoitzean eta abuztuari dagokionez, Antioko baseliza eta interpretazio zentrua, eta Ezkioko Igartubeiti ezagutzeko aukera eskaintzen digute Urola Garaian.

Larunbata honetan eguerdiko 12tan Antioko baseliza eta Interpretazio zentroa bisitatzeko aukera egongo da. Antioko baselizaren egurrezko barnealdea mirestu eta interpretazio zentroan egindako ibilbidearen bidez, ez bakarrik baselizako istorioa baizik eta Zumarraga eta eskualdeko bizimodua ezagutzeko aukera ere izango da bertan. Erreserba egitea beharrezkoa da, honetarako 943 722 042 telefono zenbakira deitu behar delarik. Bisita honen prezioa 2 euro pertsona bakoitzeko izango da eta jubilatuek eta 10 urtetik beherako umeek doan izango dute bisita. Erreserba egiteko Antioko Turismo Bulegora deitu behar da 943722042 telefono zenbakira, gaur eguerdian baino lehen eta izena eta telefonoa eman. Ondoren, taldea irtengo ez balitz turismo bulegotik jasoko dute abisua interesdunek; taldea irtetzen bada berriz, han bertan ordainduko zaio gidari bisita.

Igandean berriz, Handia pelikularen eszenatokia izan den Igartubeiti ezagutzeko aukera eskainiko da. «Pelikularen baserria ezagutu ezazu eta XVI. mendeko baserri honetan Idiazabal gazta eta sagardoa dastatu». Bisita hau ere eguerdiko 12tan izango da, prezioa bi eurokoa da. Beharrezkoa da erreserba egitea.

 

Fotos

Vídeos