Errigora ekimenaren kutxak eskatzeko aukera zabalik

Kutxa zuria, beltza edo biak eskuratzeko aukera dago. /  GALILEA
Kutxa zuria, beltza edo biak eskuratzeko aukera dago. / GALILEA

Kutxa zuria edota beltza hilaren 14ra arte (asteazkena) eskatu ahalko dira, herriko udaletxera deituz

MIRYAM GALILEA EZKIO.

Errigora ekimena gure artean dugu aurten ere eta Ezkioko Udalaren eskutik bi kutxa desberdin eskuratzeko aukera zabaltzen zaie herritarrei, eskariak egiteko epea hilaren 14ra arte zabalik egongo delarik.

Errigora Euskal Herria oinarri eta elkarlana lanabes dituen ekimen herritarra da. Nafarroa hegoaldea du ardatz eta «euskara ofiziala ez den zonaldean» eragin nahi du, eremu horretakoak propio diren produktuei Euskal Herrian bidea emanaz, euskaratik, euskararako eta euskaraz.

Norabide horretan, egunetik egunera gero eta zabalagoa den lagunarte batek ematen dio gorputza ekimenari, «ilusioz eta anbizioz ari garen herritar, nekazari, euskaltzale, ekoizle eta kontsumitzaileez osotutako sare anitz batek», azaltzen dute.

Errigora ekimen honek bi helburu ditu. Alde batetik, Nafarroa hegoaldeko laborantzako elikagaiak zuzenean gure etxera ekartzea dago; eta bestetik, dirua biltzea %25 Nafarroa hegoaldeko euskalgintzari bideratzeko. Argibide gehiago jasotzeko www.errigora.eus helbidera jo daiteke.

Txuria edota beltza

Aurtengoan ere produktu desberdinez osatutako bi kutxa proposatzen dituzte Errigoratik, bakoitzaren prezioa 50 eurokoa izanik.

Kutxa Zurian, zainzuri zuriak (Iturri, El Agricultor edo Larrinaga), Orburu-bihotzak (Ebron edo Maria Jesus), pikillo piper osoak (El Escolar edo El Agricultor), ardo beltz ekologikoa (Azpea, Lezaun edo Mendiko), ozpin ekologikoa (Mendiko edo Lezaun), zainzuri krema (Iturri), pasta ekologikoa (Martinelli), arroza (El Alcaraván), teilak (Monasterio de Cascante), ardo eta kanela -pastak (Urrutia), txokolatezko cookieak (El Molinero), piperrada (Almanaque), eta pikillo saltsa (Maria Jesus) aurkituko ditugu.

Kutxa Beltzan, berriz, zainzuri zuriak (Iturri, El Agricultor edo Larrinaga), orburu-bihotzak (Ebron edo Maria Jesus), pikillo piper osoak (El Escolar edo El Agricultor), ardo beltz ekologikoa (Azpea, Lezaun edo Mendiko), ozpin ekologikoa (Mendiko edo Lezaun), melokotoia almibarrean (Almanaque), oliba-olio birjina estra (Bardea, Castillo de Ablitas, Ekolo, La casa del aceite edo Biosasun), mahats-zuku ekologikoa (Ekolo), potxak (Maria Jesus), tomate frijitua (Pedro Luis), almendrak (Ablitasgo kooperatiba), borraja ekologikoa (La Churta), eta piper txorizero mamia (Gobeiaberri) izango ditugu.

Kutxa zuria, beltza edo biak eskuratzeko aukera zabalik dago dagoeneko, eskaera egiteko epea hilaren 14an, asteazkena, amaituko delarik. Honetarako Udaletxera deitu 943 72 13 03 telefonora eta izena eta telefonoa eman. Eskaera egiterakoan Kutxa zuria, Kutxa beltza edota biak nahi diren esan beharko da.

Contenido Patrocinado

Fotos

Vídeos