Erraldoien kalejirarekin ospatuko dute Altzo Handiaren 200 urteurrena

YARZA ALTZO.

San Inazio jaiak gerturatzen dira eta Altzon dena prest dago hasiera emateko. Datorren larunbatean, Frontoi Zaharreko Pelota Txapelketako finalerdiak jokatuko dira, 16:00etatik aurrera. Ondoren, haurren kartel lehiaketako lanen erakusketa hasiko da eta jarraian, 19:30ean, Joseba Tapiaren kontzertua izango da Batzarremuñon. 21:00etan zahagi-ardoa egingo da eta tartean kartel lehiaketako sari-banaketa egingo da. Hilaren 28an, goizeko 11:30ean botako da jaien hasiera iragarriko duen txupinazoa. Ondoren, Artea dantza taldeko gazteek emanaldia eskainiko dute plazan eta jarraian, 12:30a aldera, paellen prestaketa hasiko da. Jarraian bazkaria egingo da, eguraldi ona bada plazan eta euria ari badu frontoian. Arratsaldean Matraka elektro-txarangak alaituko du giroa. Segidan, bertso-triki-poteoa egingo da Peñagarikano eta Artola bertsolariekin, eta jarraian sagardo dastaketa egingo da. Afaria norberak eraman beharko du. Gaueko 23:30ean, Starlus, Koltxoi eta Dj Dantzalekuren kontzertuak hasiko dira.

Igandean, jubilatuentzako hamaiketakoarekin hasiko da eguna, 11:00etan. Ondoren, Euskal Herriko XI. Sega Ligaren azken ekitaldia jokatuko da Santilazpiko belardian, emakumezko, gizonezko eta gaztetxoen mailan. Bazkalondoren, plater hausketa egingo da. 18:30ean, Altzoko Handiaren jaiotzaren 200 urteurrena ospatzeko erraldoien topaketa egingo da herriko eskolatik abiatuta, Txantrea eta Bergarako konpartsetako erraldoiek parte hartuko dute kalejiran. Iluntzean, zahagi-ardoa egingo da eta afalondoren, Artea eta Alurr dantza taldeko kideen emanaldia izango da. Gauerdian Gabenara taldearekin dantzaldia hasiko da.

Hurrengo egunean, astelehenean, 11:00etan haurrentzako jolasak antolatuko dira eta jarraian hamaiketakoa eskainiko da parte hartzaileentzat. Bazkalondoren mus txapelketa antolatuko da Elordi elkartean. Iluntzeko 21:00etan herri afaria izango da zikiro jatearekin. Gauerdian, San Inazio eresia dantzatuko da eta ondoren Oxabi taldearekin dantzaldia hasiko da. Hilaren 31n, goiz eresia egingo da 9:00etan eta jarraian meza nagusia ospatuko da Andre Mariaren elizan. 12:30ean txakolin dastatzea egingo da eta bitartean toka txapelketa antolatuko da. Arratsaldean, berriz, Kukai dantza taldea eta ondoren Joselu anaien kontzertua hasiko da. 22:00etan bertso jaialdia egingo da. Gauerdian Joselu Anaiekin dantzaldiak jarraituko du.

 

Fotos

Vídeos