Lau egunetako jai egitarau mamitsua San Migelak ospatzeko

Mieltxo eta Mieltxa. Maiatzaren 3an egingo zaie agurra, aurtengo jaiei hasiera emanez. / GALILEA
Mieltxo eta Mieltxa. Maiatzaren 3an egingo zaie agurra, aurtengo jaiei hasiera emanez. / GALILEA

Herri Bazkaria, haurrentzako ekintzak, musika eta kirolak izango ditugu aurtengo festak ospatzeko

MIRYAM GALILEA EZKIO.

Egun batzuk bakarrik falta dira Ezkioko San Migel jaiei hasiera emateko. Aurten Aste Santuko oporretatik oso gertu, maiatzaren 3an , ostirala, hasi eta lau egunetan zehar egitarau mamitsua aurrera eramango dute herritarrek adin guztietara egokitutako ekintzak egongo direlarik bertan.

Goxua Pilota Txapelketaren finala izango dugu maiatzaren 3an, honek jai egitaraua zabalduko duelarik. Bigarren urtez EzkiOn kirol klubak antolaketa aurrera eramaten ari den txapelketa hau martxoan hasi zen eta ostiralero jokatu izan dira partiduak Ezkioko pilotalekuan, data aldaketa batzuk ere izan direlarik. Asteartean, hilak 30, semifinalak jokatuko dira arratsaldeko 19:00etan eta han ezagutuko ditugu finalistak, azken partidua esan bezala, San Migelak hasten diren egunean arratsaldeko 18:00etan jokatuko delarik.

Jarraian, arratsaldeko 19:00etan Mieltxo eta Mieltxaren agurra izango da, San Migeleko kanpaidorretik herriguneraino jaitsiko direlarik, ondoren Toka Txapelketa, eta eguna borobiltzeko gaueko 22:00etan Mus Txapleketa hasiko da Argindegi ostatuan, honetan izena emateko bikoteak ordu erdi lehenago bertaratuko beharko direlarik.

Herri Bazkaria

Maiatzaren 4an eguerdian aurrera egingo du egitarauak, orduan Joxe Ugartebururi omenaldia eta herri kirol jaia izango ditugularik. Ondoren, Herri Bazkaria ospatuko da.

Herri bazkarian parte hartzeko aldez aurretik txartelak Udaletxean erosi beharko dira, azken eguna apirilaren 30a (asteartea) izango delarik. Bi menu izango dira bertan aukeran: helduei egokitutakoa eta umeentzako menua. Helduen menuan (25 eurokoa) pate, zainzuriak ozpin-olio eta mahonesarekin, onddo hostopila, bakailaoz beteriko piperrak, kroketa eta porru-ganba brika sarrera gisa; eta bigarren platerrerako bakailaoa 'Maite' erara, erredondoa saltsan txanpinioi, idar eta patata purearekin; tarta dastaketa, kafea eta kopa. Bigarren aukera umeentzako menua izango da (12 eurokoa) honetan kroketak, oilasko entsalda eta izozkia izango direlarik.

Arratsaldeko 16:00etan umeentzako herri kirolak izango ditugu, pony eta zezenak ere faltako ez direlarik. Eta gauean, su artifizialak eta Elorza eta konpainia trikitilariak ez dira faltako, giroa alaitzeko.

Igandean, umeen lasterketa eta Izazpiko igoera izango dira goizean, eta arratsaldeko 18:00etatik aurrera desafio herrikoia hasiko da, ondoren Barrikotea ospatuko delarik. Eta giroa alaitzeko Batukada egongo da herrian.

Maiatzaren 8a, asteazkena, izango da jaietako azken eguna, San Migel eguna ospatuko delarik. Goizean meza nagusia egongo da 12:00etan parrokian eta jarraian luntxa eskainiko da Argindegi ostatuan.

Arratsaldeko 17:00etatik aurrera haurrentzako jolasak egongo dira pilotaleku eta herrigunean, eta trikiti eta bertsolariek alaituko dute giroa. Amaitzeko, arratsaldeko 19:00etan txokolatadak emango die aurtengo San Migel jaiei itxiera.

Más