Durangoko Azoka eta Bilboko itsasadarra lagun artean bisitatzeko azken aukera

Azoka. Urtero dago txangoa Durangora joateko. /  GALILEA
Azoka. Urtero dago txangoa Durangora joateko. / GALILEA

Izena emateko epea zabalik dago eta osteguna izango da azken eguna

MIRYAM GALILEA EZKIO.

Azken urtetan egin izan den bezala oraingoan ere Durangoko Azoka bisitatzeko aukera zabaltzen da herrian, honetaz aparte bilboko itsasadarra ere ezagutzeko aukera egongo delarik, eguna borobiltzeko.

Udalaren eta Yartu Kultura elkartearen eskutik antolatu da txangoa, hau abenduaren 6an izango da eta honetan izena emateko epea zabalik dago dagoeneko, azaroaren 29a, osteguna, izango delarik azken eguna.

Goizeko 9:00etan elkartuko dira herritarrak Anduaga industrialdean, Euskorot parean, eta Durangoko bidea hartuko dute; 10:30ak inguru egongo dira Durangon eta goiz osoan zehar bertako liburu eta artisau azokak bisitatuko dituzte.

Arratsaldeko 13:00etan Durangotik irten eta Derion egingo dute bazkaria, Txoko ona jatetxean aurten ere. Menua itxita dago eta honetan 14 euroen truke barazki-menestra, eguneko arraina eta gazta tarta egongo dira; edariak prezioan barne (kafea ez).

Bazkaldu ondoren, arratsaldeko 17:30ean Bilboko Itsasadarrean ordubeteko paseoa egingo dute itsasontziz: Bilboko erdiguneari bisita egiteko balioko du, udaletxeko zubitik hasi eta Zorrozaurre ingururaino. Arratsaldeko 18:45ak inguru autobusera igo eta etxerako bidea hartuko dute.

Egun honetako ekintzetan parte hartzeko aurretik izena eman beharko da, autobuseko lekua mugatua baita, eta honetarako udaletxera deitu beharko da 943 72 13 03 telefono zenbakira, osteguna hilaren 29a azken eguna izanik.

Autobusa eta itsasontzian bidaia 15 euroko prezioa izango dute; bazkaria aparte ordainduko da (14 euro). Adin txikikoak musutruk.

 

Fotos

Vídeos