Bikaina izan da asteburuan ospatutako Pilota Eskolako jaia

Taldea. Hamalau haur eta gaztek parte hartzen dute gaur egun Ezkioko Pilota Eskolan. / PILOTA ESKOLA
Taldea. Hamalau haur eta gaztek parte hartzen dute gaur egun Ezkioko Pilota Eskolan. / PILOTA ESKOLA

Haur, gazte eta nagusien partiduak aurrera eraman ziren eta sari banaketa eta mokadutxoa ere ez ziren falta festa honetan

MIRYAM GALILEA EZKIO.

Orain dela hilabete batzuk sortu zen eta pausoka pausoka aurrera doa Ezkioko Pilota Eskola, asteburuan euren lehenengo festa aurrera eraman zutelarik eta ederki pasatu gainera!

Herrian pilota eskola bat sortzearen nahia Udalera helarazi eta urrian sortu zen Ezkioko Pilota Eskola, izena emateko epea herrira zabaldu eta honetan hasiera batetik hamalau haur eta gaztek parte hartzen dutelarik. Ostiralero elkartzen dira Ezkioko pilotalekuan jokatzeko eta hasieratik hona aldea nabaritzen da gero! Lehenengo hilabete hauetan ikasitakoa erakutsi, orain dela aste pare bat estreinatutako kamisetak jantzi eta nola ez herrian festa giroa pizteko ospatu dute asteburuan Pilota Eskolako lehenengo jaia, larunbatean goizean zehar herriko heldu eta gazteek ederki pasatzeko aukera izan zutelarik.

Goizeko 10:00etan hasi zen Ezkioko Pilota Eskolako jaia herrian. Herriko pilotalekuan elkartu eta 5-8 urteko haurren partidek ireki zuten egitaraua. Partidak sei tantotara izan ziren eta tantoak haurrek soilik egin ahal izan zituzten, helduek pilota jaso eta haurrei bota-tzen zietelarik eurek tantoa egiten saiatuz.

Maila honetan ez zegoen lehiarik eta zazpi bikotek elkarren aurka jolasten aritu ziren, haurrek eta helduek bikoteak osatuz: Gabilondo l.a aitarekin aritu zen; Mendizabal ll.a aitarekin; Azpeitia l.a aitarekin; Unzurrunzaga II.a aitarekin; Fernandez lll.a aitarekin; Koullate l eskolako laguntzailearekin; eta Mantekon II .aeskolako laguntzailearekin ere. Ederki eta gogo biziz aritu ziren bertan.

Lehenengo partidu hauek amaitu eta jarraian, zortzi urtetik aurrerakoen partidak hasi ziren. Hauetan lau bikotek parte hartu zuten: Mendizabal eta Osinalde II.a; Ayastui II.a eta Iturralde; Mantekon eta Garmendia; Lizarralde II.a eta Unzurrunzaga I. Kasu honetan partidak 14 tantotara izan ziren eta semifinala eta finala jokatu eta gero Lizarralde II.a eta Unzurrunzaga l.a suertatu ziren irabazle.

Eguerdira aldera haurrek mokadutxoa hartzeko aurkera izan zuten jolasean jarritako indarrak berreskuratzeko, eta partiduekin amaitzeko Nagusiena aurrera eraman zen, honetan Ezkioko Alberdi Ia eta Txipi iazko Ezkioko pilota txapelketako irabazleen aurka egin zutelarik (Gaiurralde eta Txus). Honetan Alberdi Ia eta Txipi izan genituen irabazle.

Partida bukatzerakoan sari banaketa aurrera eraman zen eta mokadutxoa ere ez zen falta. Antolatzaileen esanetan oso giro polita egon zen Ezkion goizean zehar eta dena espero bezain ondo irten zen.

Pilota eskola

Ostiralero arratsaldeko 17:00etatik 18:00etara elkartzen dira Pilota Eskolako haur eta gazteak Ezkioko pilotalekuan. Momentu honetan hamalau gaztetxoek parte hartzen dute baina izena ematea zabalik dago, beraz, pilotan aritzeko nahia duten 6-16 urte bitarteko herritarrek ezkiokopilota@gmail.com helbidera ida-tzi dezakete edota EUPI (Ezkioko Udal Pilota Ikastaroa) taldeko edonorrekin hitz egin.

 

Fotos

Vídeos