Berrehun gaztetxo espero dira bihar arratsaldeko txirrindulari txapelketan

Kartela. EzkiOn klubak antolatutako ekitaldia. /  GALILEA
Kartela. EzkiOn klubak antolatutako ekitaldia. / GALILEA

MIRYAM GALILEA EZKIO.

Aspaldidanik Santa Lutzi klasika bezala ezagutu izan dugun jubenil eta alebinen txirrindu lasterketa aurrera eraman izan da Ezkioko Santa Lutzian. Orain duela urte batzuk antolatzeari utzi ondoren, EzkiOn Martxan kirol klubaren sorrerarekin berreskuratu zuten. Orain, lasterketa honi beste norabide bat eman nahi izan diote eta berrikuntza guztiekin ospatuko da larunbatean.

Horrela, bihar larunbata, Gipuzkoako Errepideko Txapelketa izango dugu EzkiOn Kirol Kluba eta Ezkioko Udalaren esku Santa Lutzia auzoan, honetan txirrindulari infantilek eta alebinek parte hartuko dutelarik. Lasterketa arratsaldeko 16:00retan hasiko da eta izena ematea Udaletxean bertan egingo da.

«Jubenil eta alebinen karrera antolatzea geroz eta zailagoa zela ikusita, aldaketa batzuk egitea pentsatu genuen, haur txikiagoekin egitea, eta lanean jarri ginen», aitortzen du EzkiOn Martxan klubeko Luis Mari Torresek.

Helburu honekin, eta herri barruan politagoa izango zelakoan, ibilbidea zehaztea falta zen: Santa Lutziko industrialdetik, autobia azpiko errotondaraino. «Non hasi eta non bukatu Federazioak aukeratuko du».

Antolatzaileek espero dutenez 200 bat gaztetxo hurbilduko dira bihar Santa Lutzira, eta adina eta sexuaren arabera taldeak antolatuko dituzte, txandaka lastertuz. «Haurrak taldetan banatuko dira eta sailkapenak egiten joango dira, azkenik, irabazlean zeintzuk diren jakin asrte», Torresek. Txapelketa amaitzerakoan sari banaketa aurrera eramango da, honetan txapelak (antolakuntzak jarritakoak) eta trofeoak (Federazioak) ez dira faltako.

Izena emateko Udaletxean bertan egokituko da leku bat eta egun honetan Anduaga elkartea eta Goza taberna ere irekita egongo dira guztien gozamenerako.

Errepidea itxita

Gipuzkoako Errepideko Txapelketa dela eta bihar, Agirretxe jatetxetik Iberdrolako zentraleraino errepidea itxita egongo da, arratsaldeko 15:30etatik 20:00etara. Froga burutzen den bitartean kotxerik ez erabiltzea esakatzen da.