Aurtengo Sagardo Asteak 1.300 bisitari baino gehiago jaso ditu

Kirikoketa. Zanpaketa bakoitzaren aurretik kirikoketa aurrera eraman da. /  ARGAZKIAK GALILEA
Kirikoketa. Zanpaketa bakoitzaren aurretik kirikoketa aurrera eraman da. / ARGAZKIAK GALILEA

'Sagar tentagarriak' tailerra ospatuko da gaur Rafa Gorrotxategiren esku, eta tailerreko izenematea itxi da tokia guztiz bete delarik

MIRYAM GALILEA EZKIO.

Hilaren 10ean hasi eta 19ra bitartean aurrera eraman da aurten Igartubeitiko Sagardo Astea, hamar egun hauetan ekintzaz jositako egitaraua aurrera eraman delarik, eta jasotako emaitzak oso positiboak dira, museotik luzatzen duten informazioaren arabera.

Aurtengo Sagardo Asteko edizioaren balantzea baikorra izan da, «bisitariak izan ditugu eta dena primeran joan da», aitortzen dute Igartubeititik. Sagarraren ziklo jasangarri eta naturalaren inguruan kon- tzientziatzen ahalegindu dira aurtengoan, bertako komunitatera hurbilduz eta ekimenera kide bezala gehituz. Jardueran mugikortasun jasangarriaren eredua ere txertatu dute, Santa Lutziako industri gunetik doako autobus zerbitzua eskainiz bai jaiegun eta baita asteburuan ere, baserriko parking-era autorik igo ezin zirelarik.

Guztira, 1.303 bisitari izan ditu baserriak aste berezi honetan, taldeka zein familia giroan, gaztetxoetatik hasi eta adinduak ere bai gerturatu direlarik. «Nabarmentzekoa da edizio honetan, astean zehar etorri diren taldeak oso handiak izan direla, hau da, eskola ume asko eta euskara ikasle heldu asko etorri direla», azaltzen dute antolatzaileek.

Iaz egin zen bezala, oraingoan ere hamar prentsaketa saio aurrera eraman dira, astean zehar 11:30ean eta jai egun, asteburuan, 12:00etan.

Bisitariei dagokienez, aurten iaz baino 186 pertsona gehiago izan dute aukera Igartubeitiko dolarea martxan ikusteko. Eta bisitari hauen perfilean erreparatzen badugu, gehiago izan dira zentro ezberdinetatik bisitatu gaituzten taldeak (ikastetxeak, kultur elkarteak, euskaltegiak...) bestelako taldeetan etorri direnak baino (familiak, lagunak...). Euskal Herriko puntu desberdinetatik etorri dira oraingoan: Gipuzkoatik %75, Arabatik %8, Nafarroatik %4, edo Bizkaiatik %3. Adinen inguruan, gehiengoa 10-20 urte bitarteko gaztetxoak izan dira (%30) ikastetxeekin baserrira gerturatu direnak.

Bisitariek, iaz bezala, erreserbak aurrez egin ahal izan dituzte eta jendearen gehiengoa hilaren 11ean, astean zehar, gerturatu izan da Igartubeitira.

Aipatzeko da ere asteburuan eta jai egunean, antzezpenak Urretxu-Zumarragako Karmakros taldeak burutu dituela.

Argazki lehiaketa

Aurtengo argazki lehiaketan hemeretzi pertsonak eman dute izena eta hauek egindako lanak azaroaren 19rako bidali beharko dituzte Igartubeitira, eta orduan epaimahaiak erabakiko ditu sarituak.

Parte hartzaileek hiru argazki bidali ahal izango dituzte igartubeiti@gipuzkoa.eus helbidera edo CD edo pen drive USB euskarrian aurkeztuko dituzte, Igartubeiti Baserri Museoko Interpretazio Zentroan, asteartetik ostiralera eta igandeetan 10:00etatik 14:00etara eta larunbatetan 10:00etatik 14:00etara eta 16:00etatik 19:00etara.

Epaimahaia Urretxuko Argazki elkarteko kide batek eta Legazpiko Ikatza elkarteko kide batek osatuko dute.

«Bestalde, Televisión Española-ko 'Aquí la tierra' saioko kazetaria eta kamarak hilaren 16an, arratsaldean, grabatu zuten Igartubeitiko dolarea martxan eta laister eskainiko dute Saioa», diote.

Dolarea, kirikoketa eta zanpaketak Sagardo Asteko protagonistak direla esan dezakegu zalantzarik gabe, baina festa honen inguruak ekintza desberdinak aurrera eramaten dira, beti ere sagarra abiapuntutzat hartuta.

Edizio honetan, Juan Mari Beltran musikariak, Rafa Gorrotxategi gozogileak, Dani Lasa sukaldariak eta Jakoba Errekondo agronomoak eta paisajistak parte hartu dute, hauek hiru lantegi eskaini dituztelarik.

Hilaren 25ean, Dani Lasa sukaldariak eta Jakoba Errekondo paisajistak 'Sagarretik sagardora. Sagardotik ozpinera' tailerra aurrera eraman zuten, eta gaur berriz Rafa Gorrotxategik 'Sagar Tentagarriak' lantegia eskainiko du, lau eta hamabi haur eta beraien familiei zuzendutakoa, honetan tokia guztiz bete delarik.

Erakusketa

Datorren astea Asier Gogortzaren Mendebalde erakusketa bisitatzeko azkena izango da. Uztailaren 18an abiatu zen eta azaroaren 4ra arte Igartubeitiko atarian dagoelarik. Egile honen aukera estetiko eta pertsonaletik abiatuz, Euskal Herriko toki ezberdinetako baserrien 22 argazkiz osatutako multzoak ezaguna zaigun iruditegia berrirakurtzea proposatzen ditu.

Contenido Patrocinado

Fotos

Vídeos