Altzoko ostatua udazkenerako prest izatea aurreikusten dute

Beheko solairuan hainbat zerbitzu egongo dira. / YARZA
Beheko solairuan hainbat zerbitzu egongo dira. / YARZA

YARZA ALTZO.

Altzoko Ostatuaren berritze lanak aurrera doaz. Martxan daude bigarren faseari dagozkion lanak, lehengo jangela eta komunak aldatuko dituenak. Jangelako egitura zaharra bota eta berria egin dute jada. Hiru solairuko egitura izango da, igogailua barne izango duena.

Lanak udazkenerako amaituta egotea espero dute. Honela, Ostatuko jangela nagusia tabernaren maila berean egongo da, baita komunak ere. Lanak dirauten bitartean, jangela lehenengo solairuan dago. «Argi geneukan lanak taberna itxi gabe egin behar zirela, negozioa ere badelako, eta horretarako diseinatu ziren», azaltzen du Joseba Elduaien alkateak. Lanen amaieran, lehenengo solairuan, terraza zabala izango du eraikinak, jangelaren gainean. Era berean, sukaldearen zati bat ere berritu da eta jangela berriaren azpiko sotoan biltegi berria edukiko du.

Taberna-jatetxe, turismo bulego eta herri-denda zerbitzuak beheko solairuan egongo dira, orain arte bezala, eta goiko bi solairuetan 100 metro koadroko eta 80 metro koadroko bi gela geratuko dira, erabilera zehatzik gabekoak oraindik. «Hainbat ideia daude, tabernarekin edota herriarekin lotuak, baina hurrengo udalaren esku geratuko da erabakia», dio.

Gainera, lan horien baitan Segoretxeko teilatua ere berrituko da. Guztira 282.000 euroko aurrekontua izango dute bigarren faseko lanek, Eusko Jaurlaritzaren diru-laguntza jaso dutena 2018-2019 epealdirako. Gasteizko Indenor enpresa ari da lanak egiten.