Alegiko Madalena jaien egitaraua prest dago jada

Giroa. Sagardo festarekin hasiko dira Madalenak. / GALILEA
Giroa. Sagardo festarekin hasiko dira Madalenak. / GALILEA

MIRYAM GALILEAITSASO.

Madalena jaiak gertu ditugu, datorren asteko ostiralean martxa hartu eta hiru egunetan zehar ekintzez jositako egitaraua aurrera eramango delarik bertan: dantza, bazkariak edo haurrentzako jolasak ez dira faltako.

Uztailaren 19an hasiko dira aurtengo Madalenak Alegia auzoan, arratsaldeko 19:30ean Sagardo festak martxa hartuko duelarik. Ondoren, Dantzaki taldearen dantza erakustaldia eta afari herikoia ez dira aurten ere faltako, azken hau sagardo festaren jarraipena delarik, oilaskoa afalduaz. Azkenik, eta eguna borobiltzeko, Joselu Anaiekin dantzaldia egongo da.

Larunbatean arratsaldean piztuko da berriro ere giroa auzoan, 18.00etatik aurrera 'Paella Erraldoia' nola egiten den ikusgai izango delarik. Itsasoko Ostatuko Manu eta Aidak paella erraldoia sukaldatuko dute. Osagai nagusia untxia izango da (Euskal Untxia, Iñaki Alberdiren babesarekin).

Behin guztia prest dagoenean, herri afaria hasiko da. Honetan parte hartzeko eta paella prestatu ahal izateko aldez aurretik izena eman beharko da, honetarako txartelak salduko dira ohiko tokietan: helduek 15 euro ordainduko dituzte eta gaztetxoek 10 euro. Afaria amaitzerakoan bingo herrikoia hasiko da, opariekin, eta DJ Gorrotxa ere musika jartzen izango dugu.

Madalena eguna

Astelehenean, uztailak 22, Madalena eguna jaietako handia, ospatuko dute auzoan. Eguerdian izango da meza elizan, bukaeran Izazpe abesbatzaren emanaldi laburra eskainiko delarik; eta jarraian Gabiriko Goruntz dantza taldearen erakustaldia egongo da. Saioaren ostean hamaiketako herrikoia eskainiko da plazan. Arratsaldean, haur eta gaztetxoentzako puzgarriak egongo dira; edaria, dastaketa eta musika ez dira faltako jaiak agurtzeko.